भावा, रडू नकोस; भावूक झालेल्या नेमारला मेस्सीनं दिली ‘जादू की झप्पी’

रिओ दि जानेरो : कोपा अमेरिका फुटबॉल स्पर्धेच्या अंतिम सामन्यात सगळ्यांचा नजरा होत्या त्या अर्जेंटिनाच्या लिओनेल मेस्सी आणि ब्राझीलच्या नेमारवर. या दोन्ही खेळाडूंनी आपल्या संघांना विजय मिळवून देण्यसाठी सर्वोतोपरी प्रयत्न केले पण अखेर अर्जेंटिनाने बाजी मारली. या सामन्यात मेस्सी किंवा नेमारला गोल करता आला नाही, पण त्यांचे प्रयत्न कौतुकास्पद होते. एकीकडे सामना संपल्यानंतर नेमार भावूक झाल्याचे दिसून आले. तर दुसरीकडे विजयानंतर अर्जेंटिनाच्या खेळाडूंनी मेस्सीला उचलून घेतले होते. अर्जेंटिनाच्या खेळाडूंच्या चेहऱ्यावरील आनंद ओसंडून वाहत होता. तर ब्राझीलच्या गोटात सर्वांना अश्रू अनावर झाले होते. भावूक झालेला नेमार कॅमेऱ्यापासून आपले तोंड लपवत होता. अनेक खेळाडू त्याचे सांत्वन करत होते. यावेळी मेस्सीही पुढे आला.

नेमार भावनिक झाल्याचे पाहून मेस्सीने खिलाडूवृत्तीने त्याला मिठी मारली आणि त्याचे सांत्वन केले. अर्जेंटिनाचा संघ एकीकडे जल्लोष साजरा करत होता, तर दुसरीकडे मेस्सी त्याच्या मित्राचे अश्रू पुसताना दिसत होता. हा अविस्मरणीय क्षण पाहण्यासाठी स्टेडियममधील प्रेक्षक थोडा वेळासाठी स्टेडियममध्येच थांबले. मित्रा, रडू नको. पराभवाचं दु:ख विसरून पुढे जा, असंच काहीसं मेस्सी आपल्या या मित्राला सांगत होता.

मारिया मारिया…
अँजेल डी मारियाने अर्जेंटिनाकडून एकमेव आणि विजयी गोल केला. आणि मेस्सीचे स्वप्नसुद्धा पूर्ण केले. सामन्याच्या 22 व्या मिनिटाला मारियाने गोल करत अर्जेंटिनाला 1-0 अशी आघाडी मिळवून दिली. मेस्सीच्या नेतृत्वात अर्जेंटिनाने 2015 आणि 2016मध्ये अंतिम फेरी गाठली होती, पण त्याला विजय मिळवता आला नाही.

उरुग्वेच्या विक्रमाशी बरोबरी
1993 मध्ये अर्जेंटिनाने कोपा अमेरिकेचं जेतेपद पटकावले होते. त्यावेळी मेस्सी अवघ्या 6 वर्षांचा होता. अर्जेंटिनाने 28 वर्षांचा दुष्काळ संपवत जेतेपद जिंकलं आणि उरुग्वेच्या विक्रमाशी बरोबरी केली. अर्जेंटिनाचे हे 15 वे जेतेपद ठरले. ब्राझीलने नऊ वेळा हे जेतेपद जिंकलं आहे.

दरम्यान, कोपा अमेरिका स्पर्धेत मेस्सीने चार गोल केले असून पाचवेळा गोल करण्यास मदत केली, तर नेमारने दोन गोल केले असून तीन गोल करण्यास मदत केली.