मुंबई : झी मराठीवरील ‘अग्गबाई सूनबाई’ या मालिकेला पहिल्या दिवसापासूनच चांगली लोकप्रियता मिळाली आहे. या मालिकेतील आसावरी, अभिजीत राजे, शुभ्रा, सोहम आणि आजोबा ही सर्वच पात्रे प्रेक्षकांच्या घरातील झाली असून त्यांच्यावर सर्वजण भरभरून प्रेम करत आहेत. या मालिकेच्या नवीन पर्वामध्ये आसावरीने सर्व घराची सूत्र हाती घेतली असून सोहम तिचा राईट हॅण्ड झाला आहे. तर अभिजीत राजे यांनी स्वतःहून सर्व घराची जबाबदारी स्वीकारली आहे.

ही मालिका आता उत्कंठावर्धक वळणावर येऊन ठेपली आहे. मालिकेत अनुराग म्हणजेच अभिनेता चिन्मय उदगीरकरची एण्ट्री झाली आहे. आधी या मालिकेत शुभ्राचे वेगळे रूप प्रेक्षकांनी पाहिली होते. ती आधी थोडी बुजरी होती. सतत बबडूच्या काळजीत असलेली शुभ्रा ‘मी करते ते बरोबर की नाही’ हा भाव तिच्या मनात असायचा. तिच्यात अजिबात आत्मविश्वास नव्हता.

बबडूची जबाबदारी असल्याने ती घरातच होती. परंतु शुभ्राचा आत्मविश्वास आता परत आला असून तिने डीबीके फूड्स जॉईन केले आहे. शुभ्राने सोहमला सुद्धा सुजॅनशी संपर्क तोडण्याची ताकीद दिली आहे. पण शुभ्राची जागा बळकावण्यासाठी सुजॅनही प्रयत्न करत आहे. सोहमच्या घरी येऊन शुभ्राला घराच्या बाहेर घालवून त्या घरावर राज्य करण्याची स्वप्न सध्या सुजॅन पाहतेय. पण शुभ्रा देखील तिची खोड मोडण्यासाठी सज्ज झाली आहे.

सुजॅनला जर हे घर आपलेसे करायचा असेल तर या घरातील सुनेची सर्व कामे देखील करावी लागतील असे म्हणत शुभ्रा तिला कामाला जुंपते. तिच्याकडून घरची सर्व कामे करून घेते. या सगळ्यानंतर आता सुजॅनची अक्कल ठिकाणावर येणार की ती पुन्हा शुभ्राला त्रास देण्यासाठी काही नवीन प्लॅनिंग करणार हे पाहणं रंजक ठरेल. शुभ्रा, सुजॅन आणि सोहमला कसे वठणीवर आणणार हे प्रेक्षकांना आगामी भागात पाहायला मिळेल.