म. टा. प्रतिनिधी,
अंमली पदार्थ नियंत्रण विभागाकडून (एनसीबी) धडक कारवाई सुरूच असून याअंतर्गत अमेरिकन अंमली पदार्थ जप्त करण्यात आले आहेत. अंधेरी व विरार येथे ही कारवाई करण्यात आली.

एनसीबीने तीन दिवसआधी डोंगरी भागात अंमली पदार्थ दलालांविरुद्ध मोठी कारवाई केली. त्यामध्ये अंमली पदार्थांच्या साखळीतील दलाल व विक्रेत्यांना पकडण्यात आले. यानंतर शुक्रवार, शनिवारी पुन्हा मोठी कारवाई केली. पहिली कारवाई ओशिवरा परिसरात करण्यात आली. त्यामध्ये एलएसडीचे ७० तुकडे, ३० ग्रॅम मारिजुआना व चरस जप्त करण्यात आला. झैद राणा व सोनू फैझ या दोन दलालांना त्यात अटक करण्यात आली. त्यांच्याकडून मिळालेल्या माहितीआधारेच अंधेरीतील लोखंडवाला परिसरात मुव्ही टॉवर येथे कारवाई करण्यात आली. त्यामध्ये शुभम सावर्डेकर ऊर्फ थापा या दलालाला हशिश या अंमली पदार्थासह अटक करण्यात आली. दुसरी कारवाई विरार भागात करण्यात आली. त्यामध्ये पूर्वेकडील मानवेल भागातून १०.२० ग्रॅम मेफेड्रोन जप्त करण्यात आले. त्यामध्ये रवी वाघेला, हर्षद वाघेला व शरद पारगी या तिघांना अटक करण्यात आली. या दोन्ही कारवाईत काही प्रमाणात ‘अमेरिकन कॅनिबीस’ हे अंमली पदार्थही जप्त करण्यात आले.