मुंबई- अभिनेत्री शिल्पा शेट्टीचा नवरा राज कुंद्राला पॉर्न फिल्म तयार करणे आणि ते वेबसाइटवर अपलोड केल्या प्रकरणी सोमवारी रात्री उशीरा अटक करण्यात आली. मुंबईच्या गुन्हा शाखेने ही कारवाई करत त्याला अटक केली आहे. पोलिसांच्या सांगण्यानुसार राज कुंद्राने पॉर्न इंडस्ट्रीमध्ये ८ ते १० कोटी रुपये गुंतवले होते. गुन्हे शाखेने सोमवारी राजला पहिल्यांदा चौकशीसाठी बोलावले आणि त्यानंतर त्याला अटक केली. फेब्रुवारी २०२१ मध्ये पॉर्न फिल्म तयार करणे आणि त्या काही अॅपवर दाखवल्याप्रकरणी गुन्हा दाखल केला होता.

फेब्रुवारीपासून सुरू होता तपास

पॉर्न फिल्मचे चित्रीकरण केल्याप्रकरणी गुन्हे शाखेने फेब्रुवारीमध्ये गुन्हा दाखल करत तपास करण्यास सुरुवात केली होती. या तपासामध्ये राज कुंद्राचे नाव सातत्याने पुढे आले. त्यामुळे पोलिसांनी त्यादृष्टीने तपास केला. या तपासात राज हाच मास्टर माईंड असल्याचे समोर आले. पोलिसांनी केलेल्या तपासामध्ये राज कुंद्रा आणि त्याच्या ब्रिटनमध्ये राहणाऱ्या भावाने मिळून केनरिन नावाची कंपनी स्थापन केल्याचे समोर आले. इतकेच नाही तर भारतातील सायबरच्या विशेष कायद्यातून वाचण्यासाठी त्यांनी या कंपनीची नोंदणी परदेशात केली होती. या कंपनीच्या पेड अॅपद्वारे पॉर्न सिनेमे दाखवले जायचे.

या पॉर्न फिल्मचे चित्रीकरण भारतामधील हॉटेल्सच्या रूममध्ये, भाड्याने घरे घेऊन केले जायचे. यात काम करणाऱ्या मॉडेल्सना मोठ्या सिनेमांत काम देण्याचे आमिष दाखवून या पॉर्न फिल्ममध्ये त्यांच्याकडून काम करवून घेतले जायचे. हे सर्व चित्रीकरण झाल्यानंतर तयार झालेल्या या पॉर्न फिल्म वी ट्रान्सफरद्वारे परदेशात पाठवल्या जायच्या.

राज कुंद्राच्याविरोधात ठोस पुरावे

दरम्यान, पोलिसांनी दिलेल्या माहितीनुसार राज कुंद्राच्याविरोधात ठोस पुरावे आहेत. याप्रकरणी अटक करण्यात आलेल्या इतर आरोपींचे जबाब तर आहेतच शिवाय काही टेक्निकल पुरावेदेखील आहेत. राज कुंद्राने या पॉर्न इंडस्ट्रीमध्ये ८ ते १० कोटी रुपयांची गुंतवणूक केली होती. याप्रकरणी आतापर्यंत पोलिसांनी दोन एफआयआर नोंदवले असून नऊ जणांना अटक केली आहे.

पोर्नोग्राफी केसमध्ये आरोपी विरोधात आयटी अॅक्ट आणि आयपीसी सेक्शन अंतर्गंत गुन्हा नोंदवला जातो. याप्रकरणामध्ये गुन्हा सिद्ध झाला तर त्या आरोपीला काही वर्षे तुरुंगवास होतो. आता जेएल स्ट्रिम नावाच्या अॅपचे मालक असलेला आणि इंडियन प्रीमिअर लीगमधील राजस्थान रॉयल्सचा सहमालक असलेल्या राज कुंद्राच्या बाबतीत काय होणार, याकडे सर्वांचे लक्ष लागले आहे.