आईच्या मृतदेहाशेजारी दोन दिवस भुकेनं तडफडत होतं मुल, मात्र कोणीच धावलं नाही मदतीला!

पुणे :करोना काळात अनेक काळीज पिळवटून टाकणाऱ्या घटना समोर येत आहेत. पुण्याजवळील पिंपरी-चिंचवड (Pimpari Chichwad) शहरातही असाच एक प्रकार घडला आहे. शहरात एका महिलेचं करोनामुळे निधन झालं. त्यानंतर मृत महिलेचं एक वर्षाचं मुल तब्बल दोन दिवस तिच्या मृतदेहाशेजारी अन्न-पाण्यासाठी धडपड करत होतं. मात्र, करोनाच्या भीतीने कोणीही त्या महिला आणि मुलाच्या जवळ गेलं नाही.

शेजारील घरातून दुर्गंध येऊ लागल्याने परिसरातील नागरिकांना महिलेच्या मृत्यूबाबत माहिती मिळाली. मात्र करोनाच्या भीतीमुळे कोणीही घराजवळ जाण्याचं धाडस केलं नाही. सुशीला गाभले आणि रेखा वाझे या दोन महिला पोलीस कर्मचाऱ्यांना या घटनेची माहिती मिळाल्यानंतर त्यांनी या घराकडे धाव घेतली.

महिला पोलीस कर्मचाऱ्यांनी घराजवळ पोहोचल्यानंतर घराचं टाळं तोडलं आणि त्यांना धक्काच बसला. कारण घरामध्ये एक महिला मृत अवस्थेत आढळली आणि तिच्या शेजारी तिचं एक वर्षाचं मुल भूकेनं व्याकूळ झालं होतं. महिला पोलीस कर्मचाऱ्यांनी तातडीने त्या मुलाला दूध व बिस्किट खाऊ घातलं. तसंच त्या मुलाची प्रकृती ठीक नसल्याने त्याला रुग्णालयात दाखल करण्यात आलं. दिलासादायक बाब म्हणजे या मुलाची करोना चाचणी निगेटिव्ह आली आहे.

पुण्यात पोलिसांच्या तत्परतेमुळे मोठा अनर्थ टळला, तब्बल २० रुग्णांचे वाचले प्राण

पोलिसांनी दिलेल्या माहितीनुसार, सदर मृत महिलेचं नाव सरस्वती राजेश कुमार असं आहे. ही महिला मूळची उत्तर प्रदेश येथील आहे. कामानिमित्त गेल्या काही महिन्यांपासून ती महिला आपल्या पती आणि मुलासह पिंपरी चिंचवड येथे वास्तव्यास होती. मात्र काही दिवसांपूर्वी तिचा पती एका कौटुंबिक कामानिमित्त उत्तर प्रदेशात गेला. त्यानंतर आता या महिलेचा मृत्यू झाल्याने खळबळ उडाली आहे. सदर महिलेचा मृत्यू नक्की करोनामुळेच झाली की अन्य काही कारणे आहेत, याबाबत पोलीस पुढील तपास करत आहेत.