करोना विषाणूच्या संसर्गावर उपयुक्त ठरणाऱ्या विविध इंजेक्शन आणि औषधांचा सध्या बाजारात प्रचंड तुटवडा आहे. रुग्णांना इंजेक्शन मिळावे यासाठी नातेवाईकांची धडपड सुरू आहे. याच संधीचा फायदा घेण्यासाठी सायबर भामटे सक्रिय झाले असून गरजूंची फसवणूक करण्यात येत आहे. तामिळनाडू येथे फार्मसी असल्याचे सांगून इंजेक्शन पाठविण्याच्या बहाण्याने सातरस्ता येथील तरुणाला ४२ हजारांचा गंडा घालण्यात आला. याप्रकरणी आग्रीपाडा पोलिस ठाण्यात गुन्हा दाखल करण्यात आला आहे.

महालक्ष्मी सातरस्ता परिसरात राहणाऱ्या आणि एका खासगी कंपनीत नोकरी करणाऱ्या किशन (बदललेले नाव) याचा मित्र २५ एप्रिल रोजी करोना पॉझिटिव्ह आला. त्याला गोरेगाव येथील एका खासगी रुग्णालयात दाखल करण्यात आले होते. करोना उपचारासाठी त्याला ॲक्टेम्रा इंजेक्शनची गरज होती. आजूबाजूला कुठेही मिळत नसल्याने या किशन याने इंजेक्शनचा ऑनलाइन शोध घेता असता त्याला एक नंबर मिळाला. या नंबरवर व्हॅाट्सअॅपच्या माध्यमातून प्रिस्क्रिप्शन पाठविले. समोरच्या व्यक्तीने किशन याला फोन केला आणि तामिळनाडू येथील वाणी फार्मसी येथून बोलत असल्याचे सांगितले. एका इंजेक्शनचे २७ हजार रुपये आणि डिलिव्हरी चार्जेस २००० असे तीन इंजेक्शनचे ८३ हजार रुपये होतील, असे फार्मसीतील व्यक्तीने सांगितले. त्यापैकी निम्मी रक्कम आगाऊ द्यावी लागेल, असेही सांगण्यात आले.

इंजक्शनची गरज असल्याने किशन याने आगाऊ रक्कम देण्याची तयारी दर्शवली. फार्मसीतील व्यक्तीने दिलेल्या बँक खात्यावर त्याने रक्कम पाठवली. मात्र पैसे मिळाल्यानंतर समोरून काहीच प्रतिसाद मिळेना. समोरून व्यक्ती फोन उचलत नव्हती आणि इंजेक्शनही मिळाले नाही. फसवणूक झाल्याचे लक्षात येताच किशन याने आग्रीपाडा पोलिस ठाण्यात तक्रार केली. कोणत्याही कंपन्या करोनावरील इंजेक्शन थेट रुग्णांना देत नाहीत तर रुग्णालयामार्फत दिली जातात. त्यामुळे इंजेक्शनसाठी कुणीही ऑनलाइन आर्थिक व्यवहार करू नये, असे आवाहन सायबर पोलिसांनी केले आहे.