राज्यातील करोना साथीच्या संकटाच्या पार्श्वभूमीवर उपमुख्यमंत्री अजित पवार यांनी त्यांचा येत्या गुरुवारी २२ जुलै रोजी येणारा वाढदिवस साजरा न करण्याचा निर्णय घेतला आहे. कार्यकर्ते, हितचिंतकांनी माझ्या वाढदिवसानिमित्त कोणत्याही प्रकारचे जाहीर कार्यक्रम आयोजित करु नयेत, गर्दी जमवू नये, प्रत्यक्ष भेटीसाठी येणे टाळावे, असे विनम्र आवाहन उपमुख्यमंत्र्यांनी केले आहे.

तसेच आपल्याला त्यादिवशी पुष्पगुच्छ पाठवू नयेत. वाढदिवसाच्या शुभेच्छा दूरध्वनी, मोबाइलवरून किंवा डिजिटल स्वरूपात व्यक्त कराव्यात. सर्वांनी करोनाप्रतिबंधक नियमांचे पालन करून राज्याला करोनामुक्त करण्याच्या लढाईत योगदान द्यावे, असे आवाहनसुद्धा अजित पवार यांनी केले आहे.

उपमुख्यमंत्री अजित पवार यांचा येत्या गुरुवारी वाढदिवस आहे. उपमुख्यमंत्र्यांच्या वाढदिवशी त्यांना शुभेच्छा देण्यासाठी कार्यकर्ते, हितचिंतक, नागरिकांची होणारी गर्दी व त्यामुळे वाढणारा करोनाचा धोका टाळण्यासाठी उपमुख्यमंत्र्यांनी त्यांचा वाढदिवस साजरा न करण्याचा निर्णय घेतला आहे.

कार्यकर्ते व हितचिंतकांनीही गर्दी जमवणारे कोणतेही कार्यक्रम आयोजित न करता त्यासाठी खर्च होणारा निधी मुख्यमंत्री सहायता निधीसारख्या करोनाविरोधी लढ्यासाठी द्यावा. मान्यताप्राप्त यंत्रणांच्या सहकार्याने करोना प्रतिबंधक नियमांचे पालन करुन रक्तदान शिबिरांसारखे लोकोपयोगी कार्यक्रम आयोजित करावेत, असे अजित पवार म्हणाले.