हायलाइट्स:
- एकनाथ खडसे यांच्या अडचणीत वाढ
- गिरीश चौधरी यांच्या ईडी कोढडीत वाढ
- पुन्हा होणार कसून चौकशी
गिरीश चौधरी यांची ईडी कोठडी आज संपणार होती. मात्र, ईडीने पुण्यातील भोसली जमिन गैरव्यवहार प्रकरणाच्या चौकशीसाठी न्यायालयाकडे वेळ वाढवून मागितला होता. त्यानुसार विशेष पीएमएलए न्यायालयाने त्यांना आज १५ जुलैपर्यंत कोठडी सुनावली आहे.
वाचाः लसीचे दोन डोस घेतलेल्याना लोकल प्रवासाची मुभा द्या; ‘या’ नेत्याचं थेट दानवेंना पत्र
गिरीश चौधरी यांच्या अटकेनंतर ईडीने एकनाथ खडसे यांनाही समन्स बजावले होते. खडसेंची ईडीकडून आठ तास चौकशी करण्यात आली होती. यापुढेही जेव्हा जेव्हा गरज भासेल, तेव्हा चौकशीचे समन्स बजावले जाईल, असे ‘ईडी’च्या अधिकाऱ्यांनी खडसे यांना कार्यालयातून निघताना आवर्जून सांगितले होते. त्यामुळेच ती चौकशी अखेरची नसून खडसे यांच्यापुढील अडचणी अद्याप संपल्या नसल्याचे स्पष्ट होत आहे. खडसे यांनी दिलेल्या माहितीच्या आधारे चौधरी यांची उलटतपासणी होण्याची शक्यता आहे. त्यासाठीच ईडीने गिरीश चौधरी यांची कोठडी वाढवून घेतल्याचा अंदाज आहे.
वाचाः मुख्यमंत्री माझ्यावर पाळत ठेवून आहेत; पटोलेंचा खळबळजनक आरोप
गिरीश चौधरींवर काय आहेत आरोप?
पुण्याजवळील भोसरी येथील औद्योगिक वसाहतीतील एका भूखंड प्रकरणात गैरव्यवहार झाल्याचा ‘ईडी’ला संशय आहे. या भूखंडाची खडसे यांनी २०१६मध्ये गिरीश चौधरी यांच्या नावे फक्त ३.७५ कोटी रुपयांची खरेदी केली होती. प्रत्यक्षात त्या भूखंडाची किंमत ३१ कोटी रुपये होती. एकंदर गैरव्यवहार बघता या सर्व व्यवहारात सुमारे ६१ कोटी रुपयांच्या महसुलाचे नुकसान झाल्याचे सकृत दर्शनी दिसून येत आहे. हा मोठा गैरव्यवहार असल्याचा ‘ईडी’ला संशय आहे.
एकनाथ खडसे यांनी गिरीश चौधरी यांच्या नावे हा भूखंड खरेदी केला. त्यासाठी पाच कंपन्यांमार्फत पैसे दिले गेले. या पाचही कंपन्यांकडून ईडीच्या समन्सला उत्तर देण्यात आलेले नाही. त्यामुळेच त्या कंपन्या बनावट असल्याचे सकृत दर्शनी दिसून येत आहे. या कंपन्या नेमक्या कुठल्या व त्यांच्यामार्फत हा व्यवहार नेमका कसा झाला, याबाबत खडसे यांची चौकशी करण्यात आली. त्यासंबंधी काही दस्तावेजांचीही पडताळणी करण्यात आली. आणखी दस्तावेज खडसे यांना सादर करण्यास सांगण्यात आले आहे,’ असे ‘ईडी’तील सूत्रांनी सांगितले.
वाचाः भाजपचा ‘सहकार’च्या माध्यमातून राष्ट्रवादीला शह?, रोहित पवार म्हणाले…