मुंबई– बॉलिवूड अभिनेता शरद केळकर सध्या प्रेक्षकांच्या मनावर राज्य करत आहे. नुकतीच शरदची ‘द फॅमिली मॅन २‘ ही वेबसीरिज प्रदर्शित झाली. वेबसीरिजमधील शरदच्या अभिनयाचं प्रेक्षक तोंडभरून कौतुक करत आहेत. तर काहींना वेबसीरिजमधील शरदची सूचीसोबतची जवळीक न आवडल्याने त्याला जीवे मारण्याच्या धमक्याही मिळत आहेत. आता शरद एक उत्कृष्ट अभिनेता म्हणून नावारूपास येत आहे. परंतु, करियरच्या सुरुवातीची काही वर्ष शरदच्या एका सवयीमुळे त्याला अनेक नकार पचवावे लागले. एका मुलाखतीत शरदने त्याला बोबडं बोलण्याची समस्या असल्याचा खुलासा केला होता.

मुख्यमंत्र्यांना ही कळकळीची विनंती… निवेदिता सराफ यांनी शेअर केला व्हिडिओ

एका वृत्तवाहिनीला दिलेल्या मुलाखतीत शरदने त्याच्या बोबडं बोलण्याबद्दल सांगताना म्हटलं, ‘मला बालपणापासूनच बोबडं बोलण्याची समस्या होती. त्यामुळे मला खूप त्रास सहन करावा लागला. माझ्या बोबडं बोलण्यामुळे लोक मला चिडवत. जेव्हा मी लहान होतो तेव्हा मला वाईट वागणूक दिली गेली. परंतु, आता माझ्याकडे पाहा. मी आता माझ्या क्षेत्रात त्या स्थानावर आहे जिथे माझ्या मुलाखती घेतल्या जातात. मला माझ्या बोलण्याची भीती वाटायची त्यामुळे मला खूप नकारांना सामोरं जावं लागायचं. अभिनय तर माझ्यासाठी फार दूरची गोष्ट होती.’

चित्रपटसृष्टीत मिळालेल्या नकाराबद्दल बोलताना शरद म्हणाला, ‘मी बराच बोबडा बोलायचो त्यामुळे मला नाकारलं जायचं. मला चित्रपटातून बाहेरचा रस्ता दाखवला जायचा. पण त्यामुळे मला आणखी बळ मिळालं. मी मेहनत केली आणि पुढील दोन वर्षात या बोबडं बोलण्याच्या समस्येपासून मुक्त झालो. नकार मिळला पण मी त्यातून शिकलो.’ शरदने ‘बाहुबली’ चित्रपटातील मुख्य पात्राला दिलेल्या आवाजाचं प्रचंड कौतुक झालं होतं. त्यासोबतच तो ‘तानाजी’ आणि ‘लक्ष्मी’ सारख्या चित्रपटात झळकला होता. आता शरदचे चाहते ‘फॅमिली मॅन ३’ ची उत्सुकतेने वाट पाहत आहेत.

प्रकृती बिघडल्याने अभिनेत्री रुपल पटेलांना केलं इस्पितळात भरती