मुंबई– छोट्या पडद्यावरील लोकप्रिय कार्यक्रम ‘बिग बॉस’ चा १४ वा सीजन नुकताच संपला आहे. आता कार्यक्रमाच्या निर्मात्यांनी १५ व्या सीजनच्या तयारीला सुरुवात केली आहे. यासाठी अनेक बड्या कलाकारांना ऑफर देण्यात येत आहे. या सीजनमध्ये सहभागी होण्यासाठी अभिनेत्री रिया चक्रवर्तीला देखील ऑफर देण्यात आली असल्याची चर्चा आहे. यासोबत ‘तेरे नाम’ चित्रपटातून लोकप्रियता मिळवणारी अभिनेत्री भूमिका चावला हिला देखील ‘बिग बॉस १५‘ मध्ये सहभागी होण्याची ऑफर देण्यात आल्याच्या चर्चा होत्या, परंतु, भूमिकाने या बातम्यांचं खंडन केलं आहे.

‘कटचा अर्थ कट असतो तिकडेच थांबतो’ परिणितीनं शेअर केला अनुभव

भूमिकाने आपल्या इन्स्टाग्रामवर एक पोस्ट करत आपल्याला ‘बिग बॉस १५’ कडून कोणतीही ऑफर आली नसल्याचं स्पष्ट केलं आहे. यासोबतच ऑफर आल्यास आपण कार्यक्रमात जाण्यास मुळीच उत्सुक नसल्याचं देखील म्हटलं आहे. भूमिकाने लिहिलं, ‘हे खोटं आहे. मला ‘बिग बॉस १५’ कडून कोणतीही ऑफर आली नाही. मला या कार्यक्रमात सहभागी होण्याची ऑफर आली असती तरीही मी त्यात सहभागी झाले नसते. मला ‘बिग बॉस’ च्या पहिल्या, दुसऱ्या आणि तिसऱ्या सीजनमध्ये सहभागी होण्याची ऑफर आली होती. परंतु, मी त्या सगळ्या ऑफर धुडकावून लावल्या.’

भूमिकाने आपलं मत स्पष्ट करत लिहिलं, ‘मी एक सेलिब्रिटी आहे. पण माझं वैयक्तिक आयुष्य सगळ्यांसमोर मांडायला मुळीच आवडत नाही. मी अशा ठिकाणी जाणार नाही जिथे २४ तास कॅमेरे तुमच्यावर नजर ठेवून असतात.’ यापूर्वी ‘नागीण ५’ फेम सुरभी चंदनाने देखील सोशल मीडियावर पोस्ट करत ”बिग बॉस १५’ कडून ऑफर आल्याच्या बातम्यांचं खंडन केलं होतं. तर अभिनेता पार्थ समथानने या कार्यक्रमात जाण्यास नकार दिला आहे.

दरम्यान, भूमिकाने ‘तेरे नाम’ चित्रपटातून सलमान खानसोबत बॉलिवूडमध्ये पदार्पण केलं होतं. त्यानंतर भूमिकाने ‘रन’, ‘दिल ने जिसे अपना कहा’, ‘सिलसिला’ आणि ‘दिल जो भी कहे’ यांसारख्या अनेक चित्रपटात काम केलं. भूमिका ‘एम.एस. धोनी- द अनटोल्ड स्टोरी’ मध्ये सुशांतच्या मोठ्या बहिणीच्या भूमिकेत दिसली होती.