मुंबई: बॉलिवूड अभिनेता अर्जुन कपूर त्याच्या बॉलिवूड करिअर किंवा चित्रपटांपेक्षा अभिनेत्री मलायका अरोरासोबतच्या नात्यामुळे सर्वाधिक चर्चेत असतो. हे दोघं लग्न कधी करणार हे तर अद्याप कोणालाच माहीत नाही मात्र हे दोघं कोणत्या चित्रपटात एकत्र दिसणार का याबाबत मात्र चाहत्यांमध्ये उत्सुकता आहे. नुकतंच एका मुलाखतीत अर्जुनला याबाबत प्रश्न विचारण्यात आला आणि त्यावर त्यानं उत्तरही दिलं.

अर्जुन कपूरचा नवा टॅटू चर्चेत, पण तो मलायकासाठी नाही तर मग कोणासाठी?
एका हिंदी वेबसाइटला दिलेल्या मुलाखतीत अर्जुनला त्याच्या खऱ्या आयुष्यातील पार्टनरसोबत एखाद्या प्रोजक्टवर काम करायला आवडेल का असा प्रश्न विचारण्यात आला. ज्याचं उत्तर देताना अर्जुन म्हणाला, ‘आयुष्यात कधीही नाही म्हणू नका. मी यावर कधी विचार केलेला नाही. असं काही माझ्या डोक्यातही कधी आलं नाही. पण जसं म्हणालो आयुष्यात कधीच कोणत्याही गोष्टीला नाही म्हणू नका.’ म्हणजे जर मलायका आणि अर्जुनला एकत्र काम करण्याची संधी मिळाली तर दोघंही ऑनस्क्रीनही एकत्र दिसू शकतात.

दरम्यान मलायका अरोरा आणि अर्जुन कपूर यांनी सुरुवातीला त्याच्या नात्याविषयी बोलणं टाळलं होतं. अनेक दिवस सिक्रेट रिलेशनशिपनंतर या दोघांनी सोशल मीडियाच्या माध्यामातून आपल्या नात्याची कबुली दिली होती. त्यानंतर हे दोघंही उघडपणे आपल्या नात्याविषयी बोलताना दिसले. एवढंच नाही तर सध्या तरी लग्नाचा कोणताही प्लान नाही आणि आम्ही एकमेकांना वेळ देत आहोत असंही या दोघांनी सांगितलं आहे.

अर्जुन कपूरच्या कामाबद्दल बोलायचं तर तो शेवटचा ‘सरदार का ग्रँडसन’ आणि ‘संदीप और पिंकी फरार’ या चित्रपटांमध्ये दिसला होता. त्याचे दोन्ही चित्रपट ओटीटी प्लॅटफॉर्मवर रिलीज झाले आहेत. याशिवाय लवकरच तो ‘भूत पुलिस’ या चित्रपटात दिसणार आहे. ज्यात त्याच्यासोबत सैफ अली खान, जैकलिन फर्नांडिस आणि यामी गौतम यांच्या भूमिका आहेत. तसेच मोहित सूरी यांच्या एक व्हिलन रिटर्न्स या चित्रपटातही तो दिसणार आहे. ज्यात दिशा पाटनी, तारा सुतारीया आणि जॉन अब्राहम यांच्या मुख्य भूमिका आहेत.