मुंबई :लोकप्रिय व्यक्तिमत्त्व आणि सत्य घटना हे नेहमीच सिनेसृष्टीच्या आकर्षणाचा विषय ठरले आहेत. त्यामुळे आजवर सत्य घटनांवरून प्रेरित असे अनेक सिनेमे होऊन गेले. लवकरच आणखी एका प्रखर विषयावर आधारित सिनेमा प्रेक्षकांच्या भेटीस येणार आहे.

सिनेनिर्माता-दिग्दर्शक करण जोहरने त्याच्या नव्या सिनेमाची घोषणा केलीय. देशभरात थरकाप उडवणाऱ्या जालियनवाला बाग हत्याकांडावर आधारित नवा चित्रपट तयार करणार आहे. या चित्रपटाची कहाणी वकील सी. शंकरन नायर यांच्यावर आधारित आहे. देशातील सुप्रसिद्ध वकील सी. शंकरन नायर यांनी न्यायालयात लढा देऊन जालियनवाला हत्याकांडातील सत्य समोर आणलं होतं. यासाठी ब्रिटीश राजवटीच्या विरोधात जाण्याचं धाडस त्यांनी केलं होतं. हीच गोष्ट आता मोठ्या पडद्यावर करण मांडणार आहे.

‘द अनटोल्ड स्टोरी ऑफ सी. शंकरन नायर‘ असं या सिनेमांचं नाव आहे. सी. शंकरन नायर यांचे पणतू रघु पलट आणि त्यांची पत्नी पुष्पा पलट यांनी लिहिलेल्या ‘द केस दॅट शूक द एम्पायर’ या पुस्तकाच्या आधारे हा चित्रपट तयार करण्यात येणार आहे. या चित्रपटाचं दिग्दर्शन करण सिंग त्यागी करणार असून लवकरच यावर काम सुरू करण्यात येणार आहे.