मुंबई : देशामध्ये करोनाची दुसरी लाट आली असून त्यामध्ये अनेकांना आपल्या जीवलगांना गमवावे लागत आहेत. अलिकडेच अभिनेत्री निक्की तांबोळीच्या भावाचे करोनामुळे निधन झाले. याची माहिती निक्कीनेच सोशल मीडियावर दिली. निकीने पुन्हा एक पोस्ट सोशल मीडियावर पोस्ट केली आहे. पोस्ट करताना तिच्या आई- वडिलांचा फोटो पोस्ट केला असून एक भावूक पोस्ट लिहिली आहे.

काय लिहिले आहे निक्कीने

सोशल मीडियावर पालकांचा फोटो पोस्ट करताना निक्कीने लिहिले आहे, ‘ देवा, या दोघांना खूप सारे धैर्य दे अशी विनंती मी तुला करते आहे. तुम्हा दोघांना अभिमान वाटेल, असे काम मी करणार आहे. दिवसरात्र मेहनत करून तुमच्यासाठी तो अभिमानाचा क्षण मी दाखवणार आहे. तुमच्या चेहऱ्यावर हे हसू कायम रहावे, यासाठी मी आता प्रयत्न करणार आहे. याक्षणी माझ्या वडिलांची स्थिती कशी असेल, याचा मी विचारही करू शकत नाही. अतिशय जवळच्या अशा दोन व्यक्ती गमावल्याने त्यांना खूप मोठा धक्का बसला आहे. अवघ्या १४ दिवसांपूर्वी त्यांनी आईला गमावले आणि आता मुलालाही गमावले… देवा माझ्या आई-वडिलांना हे सारे सहन करण्याची ताकद दे आणि त्यांना अधिक मजबूत कर…’

भावासाठी लिहिली पोस्ट

याआधी निक्की तांबोळीने भावासोबतचा फोटो शेअर करत एक भावूक पोस्ट लिहिली होती. ती लिहिते, ‘आमच्यापैकी कुणालाच माहीत नव्हते की आज सकाळी देव तुला आमच्यापासून हिरावून नेईल. आम्ही तुझ्यावर खूप प्रेम केले… आता तू गेल्यानंतरही तुझ्यावर आमचे खूप प्रेम असणार आहे. आम्ही तुला पाहू शकणार नाही मात्र तू आमच्यासोबत कायम असशील. आपल्या कुटुंबाची साखळी तुटून गेली आहे…. आता पहिल्यासारखेच काहीच राहिलेले नाही.’

निक्कीने पुढे लिहिले की, ‘ देव जेव्हा एकेक करून आपल्याला सगळ्यांना त्याच्याकडे बोलावून घेईल तेव्हा पुन्हा आपली साखळी जुळेल. आपण पुन्हा नक्की भेटणार आहोत. तुझ्यासारखा भाऊ मला दिल्याबद्दल देवाचे मी आभार मानते. तुझ्यासाठी मी कायम प्रार्थना करणार आहे आणि तू आमच्या हृदयात कायम असणार आहेस. देव तुझ्या आत्म्याला शांती देवो… दादा मी तुला खूप मिस करणार आहे…’