वसई : टूरिस्ट कार बुक करून, काही अंतरावर गेल्यावर कारचालकाला मारहाण करून, कारसह चालकाचे मोबाइल, पैसे घेऊन लूटमार करणाऱ्या टोळीचा वसईत भांडाफोड करण्यात माणिकपूर पोलिसांना यश आले. या टोळीतील दोन जणांना बेड्या ठोकल्या असून, दोन जण फरार झाले आहेत. माणिकपूर पोलिस ठाण्यात या प्रकरणी गुन्हा नोंद झाला असून पोलिस अधिक तपास करीत आहेत.

पोखराज जैवाराम जाबी आणि राजेश कुंभार चंद्रभान बिष्णोई असे या सराईत चोरट्यांची नावे आहेत. पोखराज हा जोगेश्वरी तर राजेश हा वसईच्या आनंद नगर येथील रहिवासी आहे. मिळालेल्या माहितीनुसार, सचिन जयराम हांगे या तरुणांची या दोघांनी अंबाडी परिसरातून २६ ऑक्टोबर रोजी गुजरात वापी येथे जाण्यासाठी कार बुक केली होती. सुरत येथील करंजोन टोल नाक्याजवळ आल्यानंतर या दोघांनीही चालकाच्या डोक्याला पिस्तुल लावून, त्याला मागच्या सीटवर बसायला सांगितले. काही अंतरावर नेऊन, त्याच्या खिशातील पैसे, मोबाइल घेऊन त्याला खाली फेकून कारसह पळून गेले होते. याबाबत सचिन यांनी १ नोव्हेंबर रोजी माणिकपूर पोलिस ठाण्यात गुन्हा दाखल केला होता. यामध्ये तपास करीत असताना पोलिसांनी ज्या ठिकाणाहून ही कार बुक केली होती त्याठिकाणचे सीसीटीव्ही तपासले. त्याचा आधार घेऊन माणिकपूर पोलिसांनी या चोरट्यांना पकडले. यामध्ये आणखी दोघांचा समावेश असल्याचे पोलिसांना तपासात आढळले. ते फरार आहेत.