कॉर्नर किक: गोलजाळं राखील, तो…

फुटबॉल हा सांघिक खेळ असला, तरी आपण चाहते गोल मारणाऱ्यांची चर्चा अधिक करतो. म्हणजे अगदी साध्या गप्पांतही मेस्सीचं ड्रिबलिंग, रोनाल्डोच्या ट्रिक्स, टोनी क्रुसची फ्री किक, लुका मॉड्रिचचा लाँग शॉट याबद्दल बोललं तर भाव वाढतो आणि एम्बाप्पे, लुकाकू, रॉबर्ट लेवान्डोव्स्की, हॅरी केन, गॅरेथ बेल, मोराटा आदी नुसती नावं जरी बोलता बोलता फेकली, तरी गप्पांत आपलं वजन वाढतं! या सगळ्यात गोलसाठी चाली रचणारे, गेममेकर असलेले मध्यफळीतले खेळाडू आणि आक्रमणं रोखणारी व कॉर्नर किकसारख्या प्रसंगी हेडर लगावून गोलात चेंडू धाडणारी बचावफळी आपल्या गप्पांतून निसटते, पण त्याहूनही अधिक दुर्लक्ष होतं, ते गोलकीपरकडे. गोलजाळं राखणारा हा खेळाडू अनेक अर्थांनी फुटबॉलमध्ये महत्त्वाचा आहे. आज या सदरात गोलकीपरची आवर्जून दखल घेण्याचं कारण असं, की सोमवारी झालेल्या स्कॉटलंड-झेक रिपब्लिक, पोलंड-स्लोव्हाकिया आणि स्पेन-स्वीडन या तिन्ही सामन्यांच्या पटकथेत माझ्या मते मुख्य भूमिका निभावली, ती गोलकीपरनी.

झेक रिपब्लिकच्या पॅट्रिक शिकनं विशेषतः दुसरा गोल मारताना केलेला पराक्रम चाहत्यांनी पाहिलाच असेल. स्कॉटलंडचा गोलकीपर डेव्हिड मार्शलची त्यानं चांगलीच फसगत केली. काहींनी लगेच मार्शल कसा चुकला, याची चर्चा सुरू केली, पण स्कॉटलंडचे प्रशिक्षक स्टीव्ह क्लार्क यांनी सामन्यानंतर समंजस प्रतिक्रिया दिली. मार्शल चुकला असं म्हणण्यापेक्षा गोल करणाऱ्या शिकला त्याचं श्रेय द्या, असं त्यांनी म्हटलं. सामना पाहिलेल्यांना क्लार्क यांचं म्हणणं पटेल, कारण हा गोल होण्यापूर्वीपर्यंत मार्शलची कामगिरी सरसच होती. गोलशून्य बरोबरी असताना शिकनं मारलेला फटका केवळ मार्शलनं बाहेर काढल्यानं गोल वाचला होता. उत्तरार्धातही शिक आणि नंतर व्लादिमीर दरिदा या दोघांचे फटके मार्शलनं ज्या तडफेनं झेप घेऊन अडवले त्याला तोड नव्हती. तिकडे झेक रिपब्लिकच्या तोमास वास्लिकनंही अप्रतिम बचाव केले. पूर्वार्धात अँडी रॉबर्ट्सनच्या पायातून गोळीसारख्या सुटलेल्या फटक्याला वास्लिकनं मोठ्या शर्थीनं हात मध्ये घालून गोलजाळ्याच्या बाहेरचा रस्ता दाखवला. उत्तरार्धात तर त्यानं कमाल केली. एरवी अन्य कोणत्याही गोलकीपरला लिंडन डाइक्सचे गोलात जाणारे ते दोन फटके अडवता आले नसते, पण परवा वास्लिकच्या पूर्ण ताणलेल्या पायांनी ते गोलजाळ्याबाहेर ढकलले. विजय आणि बरोबरी यातला फरक कधीकधी गोलकीपर ठरवतो, तो असा. अशीच कमाल स्वीडनच्या रॉबिन ओल्सननं स्पेनविरुद्धच्या सामन्यात केली. मिळालेल्या संधी गोलात ढकलण्यासाठी जे काही करावं लागतं, ते सगळं स्पेनच्या दानी ओल्मोनं केलं होतं, पण दिवस ओल्सननं हे दोन्ही फटके शिताफीनं गोलजाळ्यात जाण्यापासून रोखले. अशीच एक सुवर्णसंधी उत्तरार्धात जेरार्ड मोरेनोनं जवळपास साधलीच होती, पण तिचं गोलात होणारं रूपांतर रोखलं ओल्सननं. स्पेननं जवळपास 75 टक्के वेळ सामन्यावर वर्चस्व राखून विक्रमी 830 पास दिले, पण तरी स्वीडन आणि स्पेन सामना गोलशून्य बरोबरीत सुटला, तो केवळ ओल्सनमुळं. पोलंडचा गोलकीपर वोहचेन्क शुतेस्नीला मात्र स्लोव्हाकियाविरुद्धच्या सामन्यात हिरो होण्याची संधी साधता आली नाही. मग त्याची प्रमुख भूमिका का? तर स्लोव्हाकियाच्या पहिल्या गोलची नोंद शुतेस्नीचा स्वयंगोल म्हणून झाली याकरिता. या गोलनं स्लोव्हाकियाला सामन्यात सूर गवसला आणि पोलंडनं अनेक चांगली आक्रमणं रचूनदेखील विजय झाला स्लोव्हाकियाचा. गोलकीपरच कधीकधी सामन्याचं भवितव्य घडवतात, ते असं. गोलजाळं राखील, तो विजयी होईल, असं म्हणतात ते उगीच नाही.

[email protected]