मुंबई : छोट्या पडद्यावरील लोकप्रिय अभिनेत्री स्मृती ईराणी यांनी अभिनयाला अलविदा करत राजकारणात सक्रीय झाल्या. ज्या प्रमाणे स्मृती यांनी अभिनयाच्या क्षेत्रामध्ये लोकप्रियता मिळवली होती तितकीच लोकप्रियता त्यांनी राजकारणातही मिळवली आहे. स्मृती आता केंद्रीय मंत्रीमंडळामध्ये मंत्री आहेत. राजकारणासारख्या गंभीर क्षेत्रात काम करत असूनही स्मृती यांची विनोदबुद्धी तितकीच तल्लख आहे. याचे प्रत्यंतर अनेकदा येते. आता देखील त्यांनी सोशल मीडियावर एक व्हिडीओ शेअर केला आहे. हा व्हिडीओ पाहून युझर्सनी त्यांच्या विनोद बुद्धीचे भरभरून कौतुक केले आहे.

काय आहे हा व्हिडीओ

स्मृती ईराणी यांनी त्यांच्या इ्स्टाग्राम अकाऊंटवर एक व्हिडीओ शेअर केला आहे. हा व्हिडीओ शेअर करत स्मृती यांनी त्यांना टेनीस खेळाबद्दलचे त्यांचे प्रेम जाहीर केले आहे तसेच स्टेफी ग्राफ ही त्यांची आवडती खेळाडू असल्याचेही सांगितले आहे. इथपर्यंत सर्व काही ठीक आहे. परंतु हा व्हिडीओ शेअर करताना स्मृती यांनी जी फोटोओळ लिहिली आहे ती कम्माल आहे. हा व्हिडीओ शेअर करत स्मृती यांनी त्यांच्या लोकप्रिय मालिकेचे म्हणजे ‘क्यों की सास भी कभी बहू थी’ या मालिकेचा उल्लेख फोटो ओळीत केला आहे. त्यांनी लिहिले आहे , ‘ क्योंकि बहू भी कभी टेनिस फैन थी…’ स्मृती यांनी दिलेली ही फोटो ओळ आणि शेअर केलेला व्हिडीओ दोन्ही पाहून युझर्स हसून हसून बेजार होत आहेत. आतापर्यंत या व्हिडीओला अडीच लाखांहून अधिक व्ह्यूज मिळाले आहेत.

स्मृती यांनी जो व्हिडीओ शेअर केला आहे त्यामध्ये विम्बल्डंनची एक मॅचमधील एक प्रसंग आहे. त्यामध्ये एकेकाळची ख्यातनाम टेनिसपटू स्टेफी ग्राफ कोर्टवर खेळताना दिसत आहे. मॅच सुरू असताना स्टेफीच्य एका चाहत्याने तिला तू माझ्याशी लग्न करशील का? असे ओरडून विचारले. त्यावर स्टेफी त्याला हसून विचारते की, तुझ्याकडे किती पैसे आहेत? स्टेफीचे हे उत्तर ऐकून तिथे उपस्थित असलेले प्रेक्षकही हसू लागतात.

अलिकडेच स्मृती ईराणी यांची अभिनेता मनिष पॉलने भेट घेतली होती. मनिष जेव्हा स्मृती यांना भेटला तेव्हा त्याला चहा ऐवजी काढा देण्यात आला. या दोघांच्या भेटीचा फोटो देखील मनिषने शेअर केला आणि लिहिले होते, काय दिवस आले आहे बघा आता चहा ऐवजी सगळेजण काढे पाजत आहेत…