मुंबईः भाजपाचे दिवंगत ज्येष्ठ नेते प्रमोद महाजन यांची आज पुण्यतिथी आहे. प्रमोद महाजन यांना भाजप नेत्यांसह राज्यभरातील नेत्यांनी सोशल मीडियाच्या माध्यमातून आदरांजली वाहिली आहे. मात्र, या सगळ्यात त्यांच्या कन्या व भाजप नेत्या पूनम महाजन यांचं ट्वीट लक्षवेधी ठरत आहे.

प्रमोद महाजन यांची आज पुण्यतिथी आहे. भाजपसह अनेक नेत्यांनी सोशल मीडियाच्या माध्यमातून त्यांना आदरांजली वाहिली आहे. पूनम महाजन यांनीही एक भावूक ट्वीट केलं आहे. या ट्वीटच्या माध्यमातून त्यांनी महाजनांच्या आठवणी जागवल्या आहेत. तसंच, प्रमोद महाजनांसोबतचा बालपणीचा एक फोटोही शेअर केला आहे.

‘मोदी- शहांकडे निवडणुका जिंकण्याचे तंत्र, पण ते अजिंक्य नाहीत’

पूनम महाजनांनी ट्वीट करत म्हटलं की, ‘बाबा, १५ वर्षांनंतरही तुमच्या आठवणी अजूनही आमच्या हृदयात जिवंत आहेत,’ असं भावूक ट्वीट पूनम महाजन यांनी केलं आहे.

दरम्यान, प्रमोद महाजन भाजपचे चाणक्य म्हणून ओळखले जात होते. अटल बिहारी वाजपेयींच्या सरकारमध्ये त्यांनी केंद्रीय मंत्रीपदही भूषवलं होतं. २००६मध्ये प्रमोद महाजन यांची त्यांच्या भावानं गोळ्या झाडून हत्या केली. या घटनेनंतर देशानं एक महान नेता गमावला.

युतीचा शिल्पकार

बाळासाहेब ठाकरे आणि प्रमोद महाजन- गोपीनाथ मुंडे हे युतीचे शिल्पकार होते. हिंदुत्वाच्या विचाराच्या धाग्याने भाजपच्या सोबत बांधण्यात प्रमोद महाजन याना यश आले. व युतीच्या राजकारणाची ऐतिहासिक मुहूर्तमेढ रोवली गेली. महाराष्ट्रात अनेक कठिण प्रसंगातून भाजपला त्यांनी बाहेर काढलं होतं. राज्यात भाजप वाढवण्याचं काम महाजन यांनी केलं.