सुरज कांबळे

मनोरंजनसृष्टीत निखळ आणि चिरंतर मैत्रीची बरीच उदाहरणं आहेत. याच उदाहरणांपैकी एक म्हणजे अभिनेत्री सोनाली कुलकर्णी आणि कोरिओग्राफर फुलवा खामकर यांची मैत्री. या दोघींच्या मैत्रीला नुकतीच दहा वर्षं पूर्ण झाली आहेत. ‘स.. सासूचा’ या चित्रपटासाठी दोघींनी एकत्र काम केलं होतं. पण त्यांची मैत्री विशेष खुलली ते ‘नटरंग’ या चित्रपटाच्या सेटवर.

फुलवा या चित्रपटासाठी सेटवर गेलेली असताना तिला ‘फुलवा ताई’ अशी मोठ्यानं हाक मारणारी सोनाली अजूनही आठवते. सोनालीसाठी फुलवाला भेटणं आणि तिच्यासोबत काम करणं ही एक फॅन मोमेंट होती. सोनाली आणि फुलवा यांच्या मैत्रीला इथूनच सुरुवात झाली. त्यानंतर अनेक इव्हेंट्स आणि चित्रपटांच्या निमित्तानं दोघी एकत्र काम करू लागल्या. याच दरम्यान दोघींची मैत्री घट झाली. इतकंच नव्हे तर त्या आता एकमेकांच्या कुटुंबाच्या भागही झाल्या आहेत. दोघींच्या कुटुंबातील सदस्यांची आपापसातील मैत्रीदेखील विशेष उल्लेखनीय आहे.

आपल्या या जिवाभावाच्या मैत्रिणीविषयी फुलवा म्हणते, ‘माझ्यासाठी सोनाली बहिणीसारखी आहे. आमची पहिली भेट आणि आजचा दिवस या प्रवासात आमच्यात अनेक गोष्टी बदल्यात. माझ्या एक खोलीच्या घरापासून ते आता फ्लॅटमध्ये येण्याचा प्रवास सोनालीनं पाहिला आहे. तिची मैत्री नेहमीच मला उत्साह देणारी राहिली आहे. सोनालीला मैत्रीण म्हणण्यापेक्षा मी माझी बहीण म्हणणंच पसंत करते’. १० वर्षांच्या या मैत्रीविषयी सोनाली म्हणते ‘फुलवा ताई माझ्यासाठी एक प्रेरणादायी व्यक्तिमत्त्व आहे. मी तिला भेटण्या अगोदर तिच्याविषयी बरंच वाचलं, पाहिलं होतं. तिचं काम पाहून मी नेहमीच थक्क झाले आहे. तिच्या सहवासाची ही दहा वर्षं फार अमूल्य होती. माझ्या आणि तिच्या जडणघडणीत ही वर्षं कशी निघून गेली काही कळलंच नाही.’

या दोघींची मैत्री अनेकदा सोशल मीडियावर फोटो, व्हिडीओच्या माध्यमातून दिसत असते. फुलवानं त्या दोघी नृत्य करतानाचा एक व्हिडीओ नुकताच शेअर केला आहे. त्याला चाहत्यांनी भरभरून प्रतिसाद दिला आहे.