बिल्डर व चित्रपटांच्या निर्मितीसाठी वित्तपुरवठा करणारा युसुफ लकडावाला याच्यावरील गोळीबार प्रकरणात सीबीआयने कुख्यात गुंड छोटा राजन याच्यासंदर्भात दाखल केलेला क्लोजर रिपोर्ट विशेष सीबीआय न्यायालयाने नुकताच स्वीकारला. त्यामुळे राजन या खटल्यातून मुक्त झाला. मात्र, त्याच्याविरोधात अनेक गुन्ह्यांचे खटले सुरू असल्याने त्याचा तुरुंग मुक्काम कायमच राहणार आहे.

सीबीआयने २००१मधील या गोळीबार प्रकरणात तीन महिन्यांपूर्वी ‘क्लोजर रिपोर्ट’ दाखल केला होता. आरोपीविरोधात पुरेसे सबळ पुरावे नसल्यास तपास संस्थेकडून असा अहवाल न्यायालयात दाखल केला जातो. सध्या ७६ वर्षीय युसुफही आर्थिक गैरव्यवहारप्रकरणी ‘ईडी’ने दाखल केलेल्या गुन्ह्याच्या प्रकरणात न्यायालयीन कोठडीत आहे. त्यामुळे राजनच्या प्रकरणात युसुफला व्हिडिओ कॉन्फरन्सिंगद्वारे हजर करण्यात आले. तेव्हा, राजनच्या संदर्भातील क्लोजर रिपोर्ट स्वीकारण्यास आपली हरकत नसल्याचे युसुफने न्यायालयाला सांगितले. त्यानंतर विशेष न्यायाधीश ए. टी. वानखेडे यांनी सीबीआयचा अहवाल स्वीकारला आणि राजनला फौजदारी दंड संहितेच्या कलम १६९ अन्वये सोडण्याचा आदेश काढला.