चित्रीकरणादरम्यान सेटवर पडला अभिनेता, रुग्णालयात झाला मृत्यू

नवी दिल्लीः तायवानमध्ये जन्मलेला अभिनेता आणि मॉडेल गॉडफ्रे गाओचा आज चीनमध्ये अपघाती मृत्यू झाला. गॉडफ्रे एका टीव्ही शोचं चित्रीकरण असताना हा अपघात झाला. ३५ वर्षीय गॉडफ्रे गाओ ‘चेज मी’ या रिअॅलिटी शोचं चित्रीकरण करत होता. विशेष म्हणजे पाहूणा कलाकार म्हणून तो या शोमध्ये गेला होता. रुग्णालयातील अधिकाऱ्यांच्यामते, गॉडफ्रे गाओचा हृदयविकाराच्य धक्क्याने मृत्यू झाला. गुरुवारी तायवानमध्ये त्याचं पार्थिव नेण्यात येईल. गॉडफ्रे गाओच्या निधनाबद्दल बोलताना शोचे निर्माते म्हणाले की, एका टीम इवेंटमध्ये तो खाली पडला, ज्यामुळे त्याचा मृत्यू झाला. निर्माते म्हणाले की, ‘चित्रिकरण सुरू होतं आणि सेटवर अचानक गाओ सेटवर कोसळला आणि त्याची शुद्ध हरपली. यानंतर त्याला तातडीने रुग्णालयात नेण्यात आले. पण तेथे त्याचा मृत्यू झाला.’ चीनमधील मीडियाने प्रसिद्ध केलेल्या वृत्तानुसार २ वाजता (स्थानिक वेळ) ही घटना घडली.
२०११ मध्ये लक्झरी ब्रँड लुई विटॉनच्या एका जाहिरातीसाठी निवडण्यात आलेला गाओ हा पहिला आशियाई मॉडेल होता. यानंतर त्याने हॉलिवूडपटातही काम केलं. ‘द मोर्टल इन्स्ट्रमेन्ट्सः सिटी ऑफ बोन्स’मध्येही त्याने काम केलं होतं. चीनमध्येही गॉडफ्रे गाओ हे एक प्रसिद्ध नाव आहे.