जळगाव :
दुचाकीचा धक्का लागल्याचे निमित्त होऊन एम. जे. कॉलेजच्या पार्किंगमध्ये तरुणांमध्ये झालेल्या वादाचे पर्यावसन हाणामारीत झाले. भरपावसात झालेल्या या हाणामारीत यातील एका गटातील तरुणाने मुकेश उर्फ बंटी मधुकर सपकाळे (वय २२, रा. कोळीवाडा, आसोदा) या विद्यार्थांच्या छातीत चॉपरने भोसकून खून केल्याची खळबळजनक घटना शनिवारी (दि. २९) दुपारी १ वाजता घडली. या प्रकरणी मृत विद्यार्थ्याचा भाऊ रोहितने दिलेल्या फिर्यादीवरून रामानंद नगर पोलिस ठाण्यात खूनाचा गुन्हा दाखल करण्यात आला आहे. एका संशयितास पोलिसांनी ताब्यात घेतले आहे.
मुकेश सपकाळे हा मू. जे. महाविद्यालयात तृतीय वर्ष बी. कॉम. ला होता. त्याचा लहान भाऊ रोहित (वय १९) हा सेतू सुविधा केंद्राची कामे करतो. सध्या महाविद्यालयात प्रवेश प्रक्रिया सुरू असल्यामुळे रोहितने मोठा भाऊ मुकेश, लहान भाऊ सौरव (वय १७) यांच्यासह गावातील काही तरुणांना प्रवेशासाठी आवश्यक असलेली कागदपत्रे तयार करून दिली होती. ही कागदपत्रे संबधितांना देण्यासाठी रोहित शनिवारी दुपारी १२.४५ च्या सुमारास महाविद्यालयात आला होता.
रोहित दुचाकीवर येत असताना दुसऱ्या दुचाकीवर ट्रीपल सीट तरुण त्याच्या पुढे जात होते. या तरुणांना अचानक ब्रेक दाबला. त्यामुळे राहितनेदेखील त्याची दुचाकी उभी केली. या वेळी समोर असलेली दुचाकी थोडे अंतर मागे आल्यामुळे त्यांच्या दुचाकीचा धक्का रोहितच्या दुचाकीस लागला. या कारणावरून ट्रीपलसीट तरुणांनी रोहितशी वाद घातला. काही सेकंदातच या वादाचे पर्यावसन हाणामारीत झाले. तिन्ही तरुणांनी मारहाण केल्याने रोहितने त्याचा मोठा भाऊ मुकेशला माहिती देवून बोलावून घेतले. मुकेश तेथे आल्यावर मारहाण करणाऱ्या तरुणाच्या परिचयाचे आणखी तरुणदेखील तेथे आले. त्यांनी रोहित व मुकेश या दोघांना बेदम मारहाण सुरू केली. त्यातील एका तरुणाने कमरेत खोचून आणलेला चॉपर काढून मुकेशला डाव्या बाजूला छातीत खुपसला. यानंतर कपाळावर व छातीवर आणखी एक-एक वार केले. यामुळे मुकेश बेशुद्ध होऊन थेट जमिनीवर कोसळला. त्यानंतर मारहाण करणारे घटनास्थळावरन पसार झालेत. रोहितने गावातील काही मित्रांच्या मदतीने बेशुद्ध अवस्थेतीत मुकेश याला शासकीय वैद्यकीय महाविद्यालय व रुग्णालयात दाखल केले. वैद्यकीय अधिकाऱ्यांनी तपासणी करून त्याला मृत घोषित केले.
सीसीटीव्ही फुटेजवरून तपास
घटनास्थळी पोलिस आल्यावर त्यांनी परिसरातील सीसीटीव्ही फुटेजच्या तपासणीस सुरुवात केली.मात्र, वादळी वाऱ्यामुळे महाविद्यालयातील काही संगणक व सीसीटीव्ही बंद झाले आहेत. त्यातील एक सीसीटीव्ही कॅमेरा घटनास्थळावरील होता. त्यामुळे त्यात काहीच फुटेज उपलब्ध झाले नाही. जोरदार पाऊस झाल्यामुळे दुसऱ्या एका सुरू असलेल्या कॅमेराचे फुटेज अस्पष्ट आले आहेत. पोलिस अधिक्षक डॉ. पंजाबराव उगले यांनी स्वत: मू.जे.महाविद्यालयात जाऊन सीसीटीव्ही फुटेज मिळवले. यानंतर मारेकऱ्यांची ओळख पटवण्यात आली आहे. त्यांना ताब्यात घेण्यासाठी पोलिस पथके रवाना झाली आहेत.
एक संशयित ताब्यात
दरम्यान, मुकेशचा मृतदेह ताब्यात घेण्यास कुटुंबीयांनी नकार दिल्याने सिव्हिल हॉस्पिटलमध्ये तणाव निर्माण झाला होता. जोपर्यंत हल्लेखोरांना अटक होत नाही, तोपर्यंत मृतदेह घेणार नाही, असा पवित्रा त्यांनी घेतला. त्यानंतर पोलिसांनी पारोळा येथून एका संशयितास ताब्यात घेतल्याचे सांगितल्याने मृतदेह ताब्यात घेतला. पालकमंत्री गिरीश महाजन, गुलाबराव पाटील, आमदार सुरेश भोळे, चंदुलाल पटेल यांनीही रुग्णालयात जाऊन मुकेशच्या कुटुंबीयांची भेट घेतली.
हल्लेखोरांची ओळख पटली
मयत मुकेशचा भाऊ रोहित पहिल्यांदाच मू. जे. महाविद्यालयात गेला होता. त्याच दिवशी वाद होऊन त्याच्या भावाचा जीव गेला. या घटनेनंतर हल्लेखोरांच्या शोधासाठी पोलिस पथके रवाना झाली आहेत. दुपारी ४ वाजेच्या यातील संशयितांची नावे निष्पन्न झाली असून, या तरुणांचे फोटो पोलिसांनी मिळवले आहेत. हे फोटो रोहितला दाखवले होते. रोहितने यातील दोन मारेकऱ्यांना ओळखल्यानंतर त्यांचा शोध पोलिसांनी सुरू केला आहे.
महाविद्यालय सुरक्षेची जबाबदारी कोणाची?
एम. जे. कॉलेजमध्ये घडलेल्या विद्यार्थ्याच्या खूनाच्या घटनेनंतर युवाशक्ती फाउंडेशनने प्रसिद्धी पत्रकाद्वारे महाविद्यालयीन विद्यार्थ्यांच्या सुरक्षेची जबाबदारी कुणाची, असा प्रश्न उपस्थित केला आहे. अशा परिस्थितीत महाविद्यालयीन निवडणुका घेणे विद्यापीठ व महाविद्यालयीन प्रशासनासाठी आव्हान ठरणार असल्याचे म्हटले असून, त्यासाठी कुलगुरू व महाविद्यालयाच्या प्राचार्यांची भेट घेणार असल्याचेही युवाशक्ती फाउंडेशनने म्हटले आहे.