पिंपळे (ता. इंदापूर) गावाच्या सरपंचांच्या गायरानातील अतिक्रमणाबाबत जिल्हाधिकाऱ्याकडे तक्रार केल्याच्या रागातून इंदापूर कृषी उत्पन्न बाजार समितीचे संचालक व छत्रपती कारखान्याचे विद्यमान संचालक अनिल बागल यांच्यावर जीवघेणा हल्ला करण्यात आला. या प्रकरणी विद्यमान सरपंचासह आठ जणांवर गुन्हा दाखल करण्यात आला आहे. भिगवण-बारामती रस्त्यावरील पिंपळे गावाच्या हद्दीत पद्मा पेट्रोल पंपाच्या आवारात शनिवारी सायंकाळी ही घटना घडली.
हल्ल्यामध्ये अनिल बागल गंभीर जखमी झाले आहेत. या प्रकरणी अंबादास दत्तू भिसे यांनी फिर्याद दिली आहे.
भागवत रामचंद्र जाधव, रोहन दत्तू चोपडे, आकाश अनिल तांबे, कुंडलिक जनार्धन भिसे (सरपंच, पिंपळे) यांच्यासह तानाजी लक्ष्मण जाधव, उमेश भिवा जांभळे, गणेश हरिभाऊ चोरमले, बाळासाहेब कोंडिबा मोहिते (सर्व रा. पिंपळे ता. इंदापूर) अशा आठ जणांवर भिगवण पोलिस ठाण्यात गुन्हा दाखल करण्यात आला आहे. आरोपींपैकी भागवत जाधव, रोहन चोपडे आणि बाळासाहेब मोहिते या तिघांना अटक केली आहे. इतर आरोपी फरारी आहेत. सदरचा प्रकार समजताच बारामतीचे उपविभागीय पोलिस अधिकारी नारायण शिरगावकर यांनी घटनास्थळी भेट दिली. पुढील तपास सहायक पोलिस निरीक्षक जीवन माने करीत आहे.
तक्रार केल्याचा राग
विद्यमान सरपंच कुंडलिक भिसे यांचे गायरानात अतिक्रमण असल्याने सरपंच पद रद्द होण्याकरिता अनिल बागल यांनी जिल्हाधिकाऱ्यांकडे अर्ज केला आहे. याबाबत नुकतेच पथकाने घटनास्थळी पाहणी केली आहे. यामुळे ‘पद्द गेले तरी चालेल, पण सोडणार नाही’ अशी धमकी देऊन भिसे याने साथीदारांच्या मदतीने बागल यांच्यावर हल्ल्याचा कट रचल्याची माहिती समोर आली आहे. याअगोदरदेखील बागल यांचा पाठलाग करण्यात आला होता, असे पोलिसांनी सांगितले.