जळगाव : सरदार वल्लभभाई पटेल यांच्या पुतळ्याच्या मुद्द्यावरून मंगळवारी जळगाव महापालिकेच्या महासभेत सत्ताधारी भाजप आणि विरोधीपक्ष शिवसेनेत जोरदार खडाजंगी झाली. महापालिकेच्या आवारात सरदार पटेल यांचा पूर्णाकृती पुतळा उभारण्यासाठी भाजपने ठराव मांडला. मात्र, या ठरावात भाजपने केवळ लेवा समाजाच्या नगरसेवकांच्या सह्या घेतल्या असल्याने शिवसेनेच्या नगरसेवकांनी ठरावाला हरकत घेत महापुरुषांना जातीपातीत वाटू नका, असा टोला भाजपला लगावला. याच मुद्यावरून दोन्ही गटातील नगरसेवकांनी एकमेकांवर आरोप-प्रत्यारोप केल्याने जोरदार वादंग झाले.

महापालिकेची महासभा मंगळवारी सकाळी 11 वाजता महापौर भारती सोनवणे यांच्या अध्यक्षतेखाली पार पडली. सभेच्या व्यासपीठावर उपायुक्त अजित मुठे, नगरसचिव सुनील गोराणे उपस्थित होते. सभेच्या सुरुवातीलाच शिवसेनेचे ज्येष्ठ नगरसेवक नितीन लढ्ढा यांनी महापालिकेचे प्रभारी आयुक्त डॉ. अविनाश ढाकणे हे सभेला उपस्थित नसल्याने नाराजी व्यक्त केली. आजच्या सभेत भूसंपादनाशी निगडित महत्त्वपूर्ण विषयांवर निर्णय होणे अपेक्षित असताना आयुक्तच हजर नसल्याने सभेला अर्थ उरत नाही, असा मुद्दा मांडत लढ्ढा यांनी प्रशासनाच्या कार्यपद्धतीवर प्रश्नचिन्ह उपस्थित केले. त्यानंतर सभेच्या विषय पत्रिकेवरील विषयांवर चर्चेला सुरुवात झाली.

अशासकीय प्रस्तावात भाजप नगरसेवक सुनील खडके यांनी, महापालिकेच्या प्रांगणात सरदार वल्लभभाई पटेल यांचा अर्धाकृतीऐवजी पूर्णाकृती पुतळा बसविण्याबाबत दिलेल्या पत्रावर निर्णय घेण्याचा विषय चर्चेला आला. तेव्हा शिवसेनेचे नगरसेवक इब्राहिम पटेल यांनी या ठरावाला आमचा कोणताही विरोध नाही. मात्र, भाजपने ठरावात लेवा पाटील समाजाच्या नगरसेवकांच्या सह्या घेतल्या. हा ठराव सहीसाठी माझ्याकडे पाठवला असता तरी मी त्यावर विनाहरकत सही केली असती. कारण सरदार पटेल हे देशाचे गृहमंत्री होते. त्यांचे कार्य उल्लेखनीय आहे. महापुरुषांना अशा पद्धतीने जातीपातीत वाटू नका, असा टोला इब्राहिम पटेल यांनी भाजपला लगावला. त्यावर भाजपचे नगरसेवक आक्रमक झाले. ठरावावर फक्त लेवा पाटील समाजाच्या नगरसेवकांच्याच नाहीत तर इतरही नगरसेवकांच्या सह्या असल्याचा खुलासा भाजपने केला. मात्र, सेनेचे विरोधी पक्षनेते सुनील महाजनांनी यावेळी पटेल यांची बाजू उचलून धरत ‘जातीपातीचे राजकारण करणे ही भाजपची कार्यपद्धती आहे’, असे टीकास्त्र डागले. या मुद्द्यावर सेनेकडून कोंडी होत असल्याचे पाहून भाजप नगरसेवकांनी नमते घेत ठरावाबाबत सारवासारव केली. तेव्हा या विषयावर पडदा पडला.