मुंबई: नागराज मंजुळे यांनी दिग्दर्शित केलेला ‘सैराट‘ हा सिनेमा २९ एप्रिल २०१६ रोजी प्रदर्शित झाला होता. १०० कोटींच्या जवळ जाणारा हा पहिला सिनेमा होता. एका रात्रीत स्टार होणं काय असतं हे रिंकू राजगुरू आणि आकाश ठोसर यांनी तेव्हा अनुभवलं होतं. सिनेमातील आर्ची आणि परश्या या जोडीला प्रेक्षकांनी अक्षरशः डोक्यावर घेतले होते. आता हे दोघे नागराज मंजुळे यांच्या ‘झुंड’ सिनेमातून बॉलिवूडमध्ये पदार्पण करणार आहेत. या सिनेमात ते महानायक अमिताभ बच्चन यांच्यासोबत काम करणार आहेत.

रिंकू आणि आकाशची ऑनस्क्रीन केमिस्ट्री प्रेक्षकांना खूपच आवडली होती. खऱ्या आयुष्यामध्ये रिंकू आणि आकाश हे छान मित्र आहेत. अलिकडेच हे दोघेजण भेटले होते. त्या दोघांच्या भेटीचे फोटो रिंकून तिच्या इन्स्टाग्राम अकाउंटवरून शेअर केले आहेत. हे फोटो शेअर करताना तिने लिहिले आहे, ‘जेव्हा तुमचा जुना मित्र खूप दिवसांनी भेटतो तेव्हा प्रचंड आनंद होतो. या भेटीत जेव्हा कळतं की काहीच बदललं नाही तेव्हा हा आनंद द्विगुणीत होतो.’ रिंकू प्रमाणेच आकाशने देखील त्याच्या इन्स्टाग्रामवर या दोघांचे फोटो शेअर केले आहेत.

दरम्यान, रिंकूच्या पोस्टवर त्या दोघांचेही चाहते भरभरून लाइक आणि कमेन्ट करत आहेत. काहींनी म्हटले आहे की तुम्हाला दोघांना एकत्र पाहून खूप आनंद झाला आहे. या दोघांची जोडी ऑनस्क्रिन खूपच छान दिसली होती. त्यामुळे त्यांनी खऱ्या आयुष्यातही एकमेकांना जोडीदार म्हणून निवडावे, अशी भावना काही चाहत्यांची आहे. त्यामुळेच एका चाहत्याने या पोस्टवर लिहिले की, ‘तुम्ही दोघे लग्न कधी करणार आहात.’ तर आणखी एका युझरने ही बेस्ट जोडी असल्याची प्रतिक्रिया दिली आहे. अनेकांनी या दोघांना पुन्हा एकदा ऑनस्क्रीन एकत्र काम करताना बघायचे आहे, अशा कमेन्टमधून सांगितले आहे.

दरम्यान, ‘सैराट’ सिनेमाला मिळालेल्या प्रचंड यशानंतर रिंकू राजगुरूने स्वतःमध्ये खूप बदल घडवून आणले आहेत. पूर्वीची रिंकू आणि आताची रिंकू यामध्ये खूपच फरक झाला आहे. आकाश ठोसरचं ट्रान्सफॉर्मेशनही चर्चेचा विषय होता. दोघांनी आपल्या ट्रान्सफॉर्मेशनवर घेतलेली मेहनत स्पष्ट दिसते.

दोघांच्या कामाबद्दल बोलायचं झालं तर ‘सैराट’ नंतर रिंकूने कागर, मेकअप हे सिनेमे केले. अनपॉज्ड, हंड्रेड या हिंदी वेबसीरिजमध्येही तिने काम केले आहे. रिंकूच्या आगामी सिनेमांमध्ये नागराज मंजुळे यांच्या ‘झुंड’ या हिंदी सिनेमाचा समावेश आहे. रिंकूचा हा पहिलाच हिंदी सिनेमा आहे. या सिनेमामध्ये अमिताभ बच्चन यांची मुख्य भूमिका आहे. याशिवाय तिने अलिकडेच ‘छू मंतर’ या मराठी सिनेमाचे चित्रीकरण पूर्ण केले आहे. या सिनेमात तिच्यासोबत प्रार्थना बेहरे, सुव्रत जोशी, ऋषी सक्सेना हे देखील आहेत. या सिनेमाचे दिग्दर्शन समीर जोशी करत आहेत.

तर आकाश ठोसर सैराट नंतर फ्रेंडशिप अनलिमिटेड या सिनेमात दिसला होता. तसेच लस्ट स्टोरी या अनुराग कश्यप दिग्दर्शित वेब सीरिजमध्येही आकाशने काम केले होते. १९६२ द वॉर इन दी हिल्स या सीरिजमधील त्याच्या भूमिकेचं विशेष कौतुक झालं. या भूमिकेसाठी आकाशने विशेष मेहनत घेतली होती. त्याचप्रमाणे आकाश देखील रिंकूप्रमाणे ‘झुंड’ या सिनेमातून हिंदी सिनेमात पदार्पण करणार आहे.