मुंबई : ‘महाराष्ट्राची हास्यजत्रा‘ कार्यक्रम तुफान लोकप्रिय झाला आहे. या कार्यक्रमातील सर्वच विनोदी कलाकार आपापल्या स्किटमधून आणि अभिनयाद्वारे प्रेक्षकांना मनमुराद हसवत असतात. आता हा कार्यक्रम दर रविवारी प्रेक्षकांना पाहता येणार आहे. दर रविवारी प्रसारित होणाऱ्या कार्यक्रमाचे नाव ‘रविवारची हास्यजत्रा’ असे असणार आहे. या कार्यक्रमाच्या पहिल्या भागामध्ये ज्येष्ठ विनोदी अभिनेते जॉनी लीवर परीक्षक म्हणून सहभागी होणार आहेत.

‘खेळाडू म्हणून तो ग्रेट असेल, पण माणूस म्हणून नक्कीच नाही’

जॉनी लीवर यांनी यावेळी हास्यजत्रेतील सर्व कलाकारांचे भरभरून कौतुक केले. तसेच ते ज्या पद्धतीने विनोद सादर करतात ते देखील वाखाणण्याजोगे असल्याचे जॉनी लीवर यांनी सांगितले. त्यांच्या या कौतुकामुळे सर्वच कलाकार भारावून गेले. या सगळ्यात अभिनेत्री नम्रता संभेराव हिच्यासाठी हा दिवस खास संस्मरणीय ठरला आहे. कारण विनोदाच्या या बादशाहने नम्रताला एक खास भेटवस्तू दिली. जॉनी लीवर यांनी केलेल्या या कौतुकामुळे नम्रताला गहिवरून आले. या खास क्षणाचा फोटो आणि त्याबद्दलच्या भावना नम्रताने एका पोस्टच्या माध्यमातून इन्स्टाग्रामवर व्यक्त केल्या आहेत.

काय म्हणाली नम्रताविनोदामधील या बापमाणसाने केलेल्या कौतुकाने अभिनेत्री नम्रात खूपच भावूक झाली आहे. तिने आपल्या भावना व्यक्त करताना लिहिले की, ‘ जेव्हा विनोदाचा बापमाणूस जॉनी लीवरजी तुमचं काम बघून सरप्राइज गिफ्ट घेऊन येतात तो तुमच्या आयुष्यातला अविस्मरणीय क्षण असतो. आपण प्रामाणिकपणे काम करत असतो धडपडत असतो, शून्यापासून सुरुवात केली अगदी ज्युनिअर आर्टिस्ट पासून ते पासिंगच्या रोलपर्यंत. आज सोनी मराठीवरील महाराष्ट्राची हास्यजत्रापर्यंतचा प्रवास सुरू आहे आणि तो सुरुच राहील. पण जेव्हा त्यात आशीर्वादाची भर पडते तेव्हा अजून हुरूप येतो उत्साह वाढतो.’

‘प्रेक्षकांचं प्रेम तर आहेच पण जेव्हा आपल्या क्षेत्रातल्या नामवंत कलावंतांचा फोन येतो त्यात विनोदाच्या बाप माणसाचा फोन येतो आणि ते आपल्या कामाचं भरभरून कौतुक करतात, तेव्हा आनंदाला पारावार उरत नाही. तो ओसंडून वाहतच राहतो, असंही कधी घडू शकतं याची कल्पनाच कधी केली नव्हती. सगळं स्वप्नवत आहे. कौतुक आणि प्रेम या व्यतिरिक्त काय हवं असतं एका कलाकाराला.’ या शब्दांत नम्रताने तिच्या भावना व्यक्त केल्या आहेत.

‘या’ स्टार कलाकारांनी दिलेला जेठालालच्या भूमिकेला नकार

या पोस्टच्या शेवटी नम्रताने जॉनी लीवर यांना टॅग केले आहे. याशिवाय सोनी मराठी, अमित फाळके, सचिन गोस्वामी, सचिन मोटे, प्रसाद खांडेकर, अजय भाळवणकर यांचे देखील आभार मानले आहे. नम्रताने साकारलेले लॉली हे पात्र जॉनी लीवर यांना खूपच आवडले होते. याबद्दल त्यांनी नम्रताचे भरभरून कौतुक केले होते.