मुंबई: ‘तानाजी : द अनसंग वॉरियर’चित्रपटाच्या निमित्तानं काजोल आणि अजय देवगणची जोडी पुन्हा एकदा मोठ्या पडद्यावर झळकणार आहे. या चित्रपटातील काजोलचा फर्स्ट लुक नुकताच प्रदर्शित करण्यात आला आहे. या चित्रपटात काजोल तानाजी मालुसरेंची पत्नी सावित्रीबाई मालुसरे यांची भूमिका साकारताना दिसणार आहे. ‘मी तुम्हाला हरू देणार नाही’ असं कॅप्शन लिहून काजोलनं ‘तानाजी : द अनसंग वॉरियर’ चित्रपटातील तिचा फोटो सोशल मीडिया अकाउंटवर शेअर केला आहे. कपाळी ठसठशीत कुंकू, नाकात नथ, डोक्यावर पदर आणि करारी नजर असा काजोलचा मराठमोळा लुक चर्चेत आहे. तिचे फॅन्स तिच्यावर कौतुकाचा वर्षाव करत आहेत.
‘सावित्रीबाई मालुसरे तानाजीच्या साहसाचा आधार…तानाजीच्या बळामागची खरी शक्ती…’ असं लिहून अभिनेता अजय देवगण यानं त्याच्या ट्विटर अकाउंटवर काजोलचा फोटो शेअर केला आहे. ‘तानाजी : द अनसंग वॉरियर’ चित्रपटाचं पोस्टरही अलीकडेच प्रदर्शित करण्यात आलं. ‘स्वराज से बढकर क्या?’ असा प्रश्न विचारत करारी मुद्रेने पाहत उभा असलेला तानाजी पोस्टरमध्ये दिसत आहे. ‘तलवारीइतकीच तीक्ष्ण बुद्धिमत्ता’ असलेला असं म्हणत अजयनं यापूर्वीही चित्रपटाचे एक पोस्टर शेअर केले होते. अजय देवगणबरोबरच अभिनेता सैफ अली खान चित्रपटात महत्त्वाच्या भूमिकेत दिसणार आहे. सैफ उदयभान राठोड यांची भूमिका साकारणार आहे.
‘आधी लगीन कोंढाण्याचं मग आमच्या रायबाचं’, असं म्हणणाऱ्या एकनिष्ठ तानाजींची गाथा अजय देवगणच्या ‘तान्हाजी : द अनसंग वॉरियर’ या चित्रपटातून पाहायला मिळणार आहे. कोंढाणा किल्ला सर करण्याची जबाबदारी महाराजांनी आपल्यावर सोपवल्याचं कळताच, मुलाचं लग्न बाजूला ठेवून तानाजी मालुसरे सज्ज झाले होते. ‘आधी लगीन कोंढाण्याचं, मग माझ्या रायबाचं’ अशी गर्जना करत ते मोहीम फत्ते करण्यासाठी गेले होते. त्याच्या अतुलनीय पराक्रमामुळे मावळ्यांनी किल्ला जिंकलासुद्धा; पण शत्रूशी बेभान होऊन लढताना हा सिंह धारातीर्थी पडला होता. त्यांच्याच स्मृतिप्रित्यर्थ कोंढाणा किल्ल्याचं नाव सिंहगड असं ठेवण्यात आलंय. लढवय्या तानाजींची ही वीरगाथा ७० एमएम पडद्यावर पाहणं हा नक्कीच विलक्षण अनुभव असेल.