दाक्षिणात्य अभिनेत्री जयंती यांचे निधन, झोपेमध्ये घेतला अखेरचा श्वास

मुंबई : कन्नड सिनेमातील प्रसिद्ध अभिनेत्री जयंती यांचे सोमवारी बेंगळुरू येथे राहत्या घरी झोपेतच निधन झाले. त्या ७६ वर्षांच्या होत्या. गेल्या अनेक दिवसांपासून जयंती आजारी होत्या. जयंती यांच्या निधनाच्या वृत्ताला त्यांचा मुलगा कृष्ण कुमार यांनी दुजोरा दिला आहे.

अभिनेत्री जयंती यांच्या निधनामुळे दाक्षिणात्य सिनेसृष्टीवर शोककळा पसरली आहे. अनेक कलाकारांनी सोशल मीडियावर अभिनेत्री जयंती यांना श्रद्धांजली वाहिली आहे.

अभिनयाची देवी म्हणून ओळख निर्माण केली

अभिनेत्री जयंती या दाक्षिणात्य सिनेमासृष्टीमध्ये अभिनयाची देवी म्हणून ओळखल्या जायच्या. जयंती यांनी १९६३ मध्ये आलेल्या जेनू गोडू या सिनेमातून अभिनयाच्या क्षेत्रात पदार्पण केले. त्यानंतर त्यांनी ५०० हून अधिक सिनेमांत काम केले होते. जयंती यांनी केवळ कन्नड सिनेमातच नाही तर तमिळ, तेलगू आणि मल्याळम सिनेमांतही काम केले. त्यांनी अनेक लोकप्रिय सिनेमांत काम करत स्वतःची वेगळी ओळख निर्माण केली. यात स्वाती किरानम, कोंडावेटी सिंघम, जस्टिस चौधरी आणि पेडरायुडु यांसारख्या सिनेमांचा समावेश आहे.

जयंती यांनी सुपरस्टार रजनीकांत, एनटी रामाराव, एमजी रामाचंद्र या दिग्गज कलाकारांसोबत काम केले होते. जयंती या एकमेव अशा अभिनेत्री होत्या ज्यांनी या तीनही सुपरस्टारसोबत काम केले होते. कर्नाटक राज्य सरकारचा अभिनयाचा पुरस्कार सात वेळा मिळवणाऱ्या त्या एकमेव अभिनेत्री आहेत. याशिवाय जयंती यांना अभिनयासाठी अनेक पुरस्कार मिळाले आहेत.

हिंदी सिनेमांतही काम

अभिनेत्री जयंती यांनी बॉलिवूड सिनेमांतही काम केले होते. त्यामध्ये तीन बहुरानियां, तुमसे अच्छा कौन है आणि गुंडा या सिनेमांचा समावेश आहे.