: संसर्गाच्या दुसऱ्या लाटेमध्ये वापरण्यात आलेल्या स्टिरॉइड आणि प्रतिजैविकांच्या अनिर्बंध वापरामुळे म्युकरमायकोसिसच्या रुग्णांचे प्रमाण वाढल्याचे दिसून येत होते. लाट ओसरायला लागल्यानंतर शहरातील रुग्णालयांमध्ये म्युकरमायकोसिसच्या रुग्णांचे प्रमाणही हळूहळू कमी होत आहे. शस्त्रक्रियांची मोठ्या प्रमाणात गरज भासत नसल्याचे वैद्यकीय निरीक्षण डॉक्टरांनी नोंदवले आहे. रुग्णालयामध्ये दाखल होण्याचे प्रमाणही पूर्वीच्या तुलनेमध्ये मागील दोन आठवड्यांपासून कमी झाल्याचे दिसून आले आहे.
मुंबई महापालिकेसह राज्य सरकारच्या रुग्णालयामध्येही म्युकरमायकोसिसचे आठवड्यातून तीन रुग्ण येत असल्याचे वैद्यकीय तज्ज्ञांनी सांगितले. या महिन्याच्या सुरुवातीला हे प्रमाण खूप मोठे होते. एक-एक रुग्णालयामध्ये वीस ते पंचवीस रुग्ण येत होते. यासंदर्भात इएनटी तज्ज्ञ डॉ. अजय डोईफोडे यांच्याकडे विचारणा केली असता त्यांनी रुग्णांची संख्या आता कमी झाल्याचे सांगितले. पूर्वी जितक्या शस्त्रक्रिया होत होत्या, तितक्या शस्त्रक्रिया आता होत नाहीत. या महिन्याच्या सुरवातीला रुग्णांचा इतका ओघ होता, की डॉक्टरांनाही वेळ मिळायचा नाही. आता मात्र परिस्थितीमध्ये समाधानकारक बदल झालेला दिसतो. जेजे रुग्णालयामध्ये १५० हून अधिक रुग्णांच्या शस्त्रक्रिया करण्यात आल्या तर केईएम रुग्णालयातील वैद्यकीय तज्त्रांनी साडेतीनशेहून अधिक रुग्णांच्या शस्त्रक्रिया केल्या आहेत.
कूपर रुग्णालयाच्या नेत्रविभागाच्या प्रमुख डॉ. चारुता मांडके यांनी त्यांचे निरीक्षण नोंदविताना सांगितले, की ‘करोनाच्या रुग्णांचे प्रमाण आता कमी होत आहे. त्यामुळेही म्युकरमायकोसिसच्या रुग्णांची संख्या कमी होत आहे.’ म्युकरमायकोसिसच्या रुग्णांचे प्रमाण वाढू नये असे वाटत असेल तर करोना आणि मधुमेह या दोन्हींवर नियंत्रण ठेवायला हवे. लस घेतल्यानंतर लोक कसेही वागतात, नियमांचे पालन करत नाहीत. मास्क लावत नाही हे वर्तन पुन्हा तिसऱ्या लाटेला निमंत्रण देणारे ठरेल त्यामुळे करोनाला दूर ठेवण्यासाठी या नियमांचे पालन करणे गरजेचे आहे, या मुद्द्याकडे डॉ. मांडके यांनी लक्ष वेधले. कूपर रुग्णालयमध्ये आतापर्यंत चाळीस रुग्णांना म्युकरमायकोसिससाठी वैद्यकीय उपचार देण्यात आले. आता त्यातील केवळ ११ रुग्ण वैद्यकीय उपचार घेत असून अन्य रूग्ण बरे होऊन घरी गेले आहेत.