मुंबई-दिलीप कुमार यांच्या जाण्याने सर्वात जास्त नुकसान कोणाचं झालं असेल तर त्या सायरा बानो. लग्नानंतर दिलीप कुमार यांची सावली होऊन सायरा बानो यांनी संसार केला. दिलीप कुमार यांच्या अखेरच्या श्वासापर्यंत त्यांनी सुश्रूषा केली. दोघांच्या वयात मोठा फरक होता. पण हा फरक त्यांच्या प्रेमात कधी आलाच नाही. आज ५५ वर्षांच्या संसारानंतर त्यांची साथ सुटली. आज दिलीप कुमार आणि सायरा बानो यांची प्रेमकहाणी जाणून घेऊ.

प्रेम कसं करावं, संसार कसा करावा, एकमेकांच्या सुख- दुःखात कशी साथ द्यावी याचं जर मुर्तीमंत उदाहरण द्यायचं झालं तर ते दिलीप कुमार आणि सायरा बानो यांचं देता येईल. दोघांच्या वयात २२ वर्षांचं अंतर होतं. पण त्यांच्याकडे पाहिल्यावर याची जाणीव कधीच झाली नाही. १९४४ मध्ये ज्वार भाटा या सिनेमांतून दिलीप कुमार यांनी सिनेसृष्टीत पदार्पण केले होते तर १९६१ मध्ये जंगल सिनेमातून सायरा बानो यांनी आपली कारकीर्द सुरू केली होती.

दोघांनी दुनिया, बैराग, गोपी आणि सगीना यांसारख्या अनेक सिनेमांत काम केले. दोघांचे अनेक सिनेमे मोठ्या पडद्यावर हिट ठरले होते. त्यांच्या ऑनस्क्रीन जोडीला प्रेक्षकांनी ऑफस्क्रीनही पसंत केलं होतं. सायरा यांच्याआधी दिलीप कुमार यांचा जीव कामिनी कौशल आणि मधुबाला यांच्यावरही जडला होता. सायरा बानो यांच्यासाठी मात्र ही एक परीकथाच होती. वयाच्या १२ व्या वर्षी त्यांना दिलीप कुमार आवडू लागले होते आणि त्यांच्याशीच लग्न करायचं असं त्यांनी ठरवलंही होतं.

१९६० रोजी मुगल-ए-आजम सिनेमाचा प्रीमिअर मराठा मंदिर येथे ठेवण्यात आलेला. १६ वर्षीय सायरा बानो आपल्या आवडत्या हिरोची एक झलक पाहण्यासाठी तिथे गेल्या होत्या पण प्रीमिअरला दिलीप कुमार गेलेच नाही. त्यानंतर जेव्हा सिनेमांत दोघांनी एकत्र काम केलं तेव्हा सायरा यांच्या आनंदाला पारावार उरला नव्हता. मनातल्या मनात सायरा यांनी स्वतःला दिलीप कुमार यांची पत्नी मानलं होतं.

दोघांच्या प्रेमात अनेक कॉन्ट्रोव्हर्सीही होत्या. लव्हस्टोरीमध्ये ट्वीट सायरा यांच्या आई नसीम बानो यांच्यामुळे आलेला. दोघांच्या प्रेमकहाणीमध्ये त्या मध्ये आल्या. पण नंतर नसीम बानो यांच्यामुळे सायरा बानो आणि दिलीप कुमार भेटले आणि ही लव्हस्टोरी पूर्ण झाली. जेव्हा दिलीप यांनी सायरा यांनी लग्नासाठी विचारले तेव्हा त्यांनी लगेच होकार दिला. १९६६ मध्ये जेव्हा दोघांचं लग्न झालं तेव्हा सायरा बानो २२ वर्षांच्या आणि दिलीप कुमार ४४ वर्षांचे होते.

लग्नानंतरही सायरा बानो यांनी सिनेमांत काम करणं सुरू ठेवलं होतं. पण १९७६ नंतर त्यांनी सिनेमांत काम करणं बंद केलं आणि आपला संपूर्ण वेळ संसार आणि पतीसाठी दिला. पती दिलीप कुमार यांच्या रुपाने कोहिनूर हिरा मिळाल्याने सायरा बानो नेहमीच देवाचे आभार मानतात.