मुंबई : ‘द फॅमिली मॅन‘ या वेब सीरिजमध्ये ‘सुची’ ही व्यक्तिरेखा साकारणारी दाक्षिणात्य अभिनेत्री प्रियमणी च्या लग्नावरून एक नवीन वाद सुरू झाला आहे. प्रियमणीने २०१७ मध्ये मुस्तफा राज याच्याशी लग्न केले. परंतु या दोघांचे लग्न अवैध असल्याचा दावा मुस्तफाची बायको आयशाने केला आहे. इतकेच नाही तर या दोघांविरोधात कोर्टात खटला देखील दाखल केला आहे.

आयशाने केलाय हा दावा

मुस्तफा आणि आयशा यांना दोन मुले आहेत. असे असूनही मुस्तफाने प्रियमणीशी लग्न केले. परंतु हे लग्न करताना त्याने आपल्याला तलाक दिला नसल्याचा दावा आयशाने केला आहे. इतकेच नाही तर तिने मुस्तफावर घरगुती हिंसाचारांतर्गंत कोर्टात केसही दाखल केली आहे. प्रियमणी ही दाक्षिणात्य सिनेमांतील आघाडीची अभिनेत्री आहे. ती विद्या बालनची चुलत बहिणही आहे. या प्रकरणासंदर्भात ई-टाइम्सने आयशाशी संपर्क साधला असता तिने सांगितले हे सर्व खरे आहे. तिने पुढे सांगितले, ‘मुस्तफा कायदेशीररित्या अजूनही माझा नवराच आहे. त्यामुळे मुस्तफा आणि प्रियमणी यांनी केलेले लग्न हे अवैध आहे. आम्ही दोघांनी तलाक घेतलेला नाही. मुस्तफाने मात्र कोर्टात तो बॅचलर असल्याचे सांगितले आहे.’

मुस्तफा म्हणाला, तिला पैसा हवाय

या प्रकरणाची दुसरी बाजू जाणून घेण्यासाठी मुस्तफाशी देखील संपर्क साधण्यात आला. तेव्हा त्याने याबाबत काहीही बोलण्याच नकार दिला. परंतु त्याने हे सांगितले की, त्याच्यावर जे काही आरोप लावले आहेत ते सर्व खोटे असून बिनबुडाचे आहेत. मी आयशाला मुलांच्या संगोपनासाठी नियमीतपणे पैसे देत आहे. परंतु तिला माझ्याकडून जास्त पैसे हवे आहेत.

२०१३ मध्ये आमचा तलाक झालाय

मुस्तफाने पुढे सांगितले की, ‘आयशा आणि मी २०१० पासून वेगळे रहात होतो आणि २०१३ मध्येच आम्ही तलाक घेतला. त्यानंतर प्रियमणीशी मी २०१७ मध्ये लग्न केले. आमच्या लग्नाला इतके वर्षे झाली तेव्हा आयशा गप्प का बसली होती.’

माझ्या गप्प राहण्याचा गैरफायदा घेतला

मुस्तफाने केलेल्या या आरोपांवर आयशा म्हणाली, ‘मी दोन मुलांची आई आहे. मी काय करणार होते. हे सर्व प्रकरण शांततेने मला सोडावयचे होते. परंतु गोष्टी शांततेने सुटत नाही हे लक्षात आल्यावर मी बोलायचे ठरवले. इतके दिवस मी गप्प बसले त्याचा वेगळा अर्थ काढण्यात आला.’