मुंबई : बॉलिवूडमध्ये सर्वाधिक लोकप्रिय आणि यशस्वी ठरलेल्या सिनेमांच्या सिक्वेलमध्ये धूमचा समावेश होता. धूम सिनेमाचे तीन सिक्वेल आतापर्यंत रिलीज झाले आहेत. धूम आण धूम २ ला प्रेक्षकांनी भरभरून प्रतिसाद दिला होता. त्या तुलनेत धूम ३ ला यथातथाच प्रतिसाद मिळाला. आता चाहत्यांना धूम ४ कधी येतो याची आतुरता आहे. अर्थात याबाबत या सिनेमाची निर्मिती करणाऱ्या यशराज बॅनरकडून कोणतीही अधिकृत माहिती आलेली नाही. परंतु सोशल मीडियावर मात्र या सिनेमा संदर्भात जोरदार चर्चा झडत आहेत.

एका चित्रपटासाठी सुपरस्टार्सना मिळणारं मानधन ऐकून येईल चक्कर, सलमान- शाहरुखसाठी तर…
काय होत आहेत चर्चा

सोशल मीडियावर या सिनेमाच्या संदर्भात खूप चर्चा होत आहे. ट्विटरवर तर धूम ४ सिनेमामध्ये बॉलिवूडचा दबंग खान अर्थात सलमान खान आणि बॉलिवूडचा खिलाडी म्हणजे अक्षय कुमार या दोगांची नावे फायनल झाल्याची चर्चा आहे. त्यामुळे या दोघांचेही चाहते आनंदित झाले आहेत. असं असलं तरी अद्याप सलमान, अक्षय अथवा यशराजचे सर्वेसर्वा आदित्य चोप्रा यांच्याकडून कोणतेही अधिकृत वृत्त आलेले नाही.

‘धूम’ मध्ये जॉन अब्राहम, दुसऱ्या भागामध्ये हृतिक रोशन आणि तिसऱ्या भागामध्ये आमिर खान यांनी खलनायाकाची भूमिका साकारली होती. या तीनही भागात एसीपी जय आणि अलीची भूमिका अभिषेक बच्चन आणि उदय चोप्रा यांनीच साकारल्या होत्या. आता या चौथ्या भागामध्ये हे दोघेही असतील की नवीन कलाकारांची एंट्री होणार याची उत्सुकता सगळ्यांना आहे.

दरम्यान,सलमान खानच्या आगामी प्रोजेक्टबद्दल सांगायचे तर अलिकेडच त्याचा ‘राधे…’ हा सिनेमा प्रदर्शित झाला. आता तो ‘अंतिम: द फायनल ट्रूथ’ या सिनेमात दिसणार आहे. लवकरच तो ‘कभी ईद कभी दिवाली’ या सिनेमाचे चित्रीकरणाला सुरुवात करणार आहे. त्याशिवाय सुत्रांनी दिलेल्या माहितीनुसार सलमान खान तेलुगूमधील सुपरहिट सिनेमा ‘खिलाडी’चा हिंदी रिमेक करणार असून त्यातही तो दिसण्याची शक्यता आहे.

अक्षय कुमारच्या आगामी सिनेमांबद्दल सांगायचे तर त्याचे अनेक सिनेमे तयार आहेत. करोनामुळे निर्माण झालेली परिस्थिती आटोक्यात आल्यानंतर त्याचे सिनेमे प्रदर्शित होती. त्यामध्ये ‘बेल बॉटम’, ‘अतरंगी रे’, ‘पृथ्वीराज’ या सिनेमांचा समावेश आहे. त्याशिवाय तो ‘रक्षा बंधन’ आणि ‘राम सेतु’ या सिनेमांसाठीही चित्रीकरण करत आहे.