मुंबई : करोनाच्या बिकट परिस्थितीत गरजू कलाकार आणि रंगमंच कामगारांच्या मदतीच्या मागणीला राज्य सरकारने वाटाण्याच्या अक्षता लावल्या आहेत. अर्थसहाय्य करण्याचा संघटनांचा प्रस्ताव सांस्कृतिक खात्याकडे महिनाभर पडून आहे. परिणामी, सांस्कृतिक खात्याचा कारभार अकार्यक्षम असल्याचा सूर नाट्यसृष्टीतून उमटत आहे. ऑनलाइन बैठकीचा दिखावा करून राज्य सरकारने रंगकर्मींच्या तोंडाला पाने पुसल्याची प्रतिक्रिया नाट्यवर्तुळातून व्यक्त होत आहे.

दोन महिन्यांपूर्वी राज्यात ‘ब्रेक द चेन’ अंतर्गत निर्बंध लावण्यापूर्वी एप्रिलमध्ये मुख्यमंत्र्यांनी नाट्यसृष्टीतील प्रतिनिधींसोबत ऑनलाइन बैठक घेतली. ज्यात नाट्यसृष्टीने गरजू कलाकार आणि रंगमंच कामगारांना राज्य सरकारने आर्थिक साहाय्य करावे, अशी मागणी केली. या मागणीबाबत मुख्यमंत्री स्वतः सकारात्मक होते. त्यानंतर पुन्हा महिन्याभराने १० मे रोजी सांस्कृतिक कार्यमंत्री अमित देशमुख यांनी ऑनलाइन बैठक घेतली. ज्यात पुन्हा एकदा ‘नाट्यसृष्टीला पूर्ण सहकार्य आणि गरजूंना अर्थसहाय्य’ करण्याबाबत आश्वासन दिले गेले. या बैठकीत खात्याचे प्रशासकीय अधिकारी देखील उपस्थित असल्याची माहिती रंगमंच कामगार संघटनेचे प्रवक्ते रत्नकांत जगताप यांनी दिली. पण, आता महिना उलटला तरी अर्थसहाय्याच्या प्रस्तावावर निर्णय झालेला नाही. एकीकडे देशभरातील इतर राज्यांमध्ये तेथील सरकार आपापल्या स्थानिक कलाकारांना आर्थिक मदत करत असताना महाराष्ट्रातील सांस्कृतिक खाते मराठी नाट्यसृष्टीकडे दुर्लक्ष का करतेय? एखाद्या रंगकर्मीने आत्महत्या केल्यावरच खात्याला जाग येईल का? असे सवाल रंगकर्मी विचारत आहेत.

प्रस्ताव राज्य सरकारच्या विचाराधीन आहे. पूर्तता होण्यास किती वेळ लागेल; हे नाही सांगता येणार. काही खात्यांची मंजुरी मिळाल्यावर पुढे तो मुख्यमंत्र्यांकडे जाईल. आवश्यकतेनुसार मंत्रिमंडळ बैठकीत हा प्रस्ताव मांडावा लागेल.

– विलास थोरात, उपसचिव (सांस्कृतिक कार्य)

बैठकीत वारंवार मागणी करूनही मदतीचा एक नवा पैसे कलाकारांना मिळालेला नाही. आता ऑनलाइन बैठक नको; ठोस निर्णय घ्या. मुंबईत कार्यरत असलेल्या गरजू रंगकर्मी कलाकारांची यादी तयार आहे. ही संपूर्ण माहिती कलाकारांच्या बँक खात्याच्या माहितीसह राज्य सरकारला देण्यास आम्ही तयार आहोत. आवश्यक ते सर्व सहकार्य कलाकार संघटना म्हणून आम्ही करू. पण, आता अजून विलंब करून सरकारने कलाकारांचा अंत पाहू नये.

– प्रदीप कबरे, अध्यक्ष, मराठी नाट्य कलाकार संघ

मुंबईत साधारण ७५० मराठी नाट्य व्यावसायिक रंगमंच कामगार आहेत. महाराष्ट्र सरकारने त्यांच्यासाठी काहीच मदत केलेली नाही. यापूर्वी मुख्यमंत्री, सांस्कृतिक मंत्री आणि सांस्कृतिक कार्य संचालनालय यांच्याशी एप्रिल २०२१ मध्ये पत्रव्यवहार झालेला असून, काहीच उत्तर मिळालेले नाही. राज्य सरकारकडून मदतीची अपेक्षा ठेवणे गैर आहे का?

– रत्नकांत जगताप, प्रवक्ता, रंगमंच कामगार संघटना