निक्की तांबोळीच्या भावाचं करोनामुळे निधन, अभिनेत्रीची भावुक पोस्ट

मुंबई: करोना व्हायरसमुळे मनोरंजन क्षेत्रातील अनेकांचं निधन झालं आहे. अशात आता अभिनेत्री आणि बिग बॉस १४ ची स्पर्धक निकी तांबोळीवर दुःखाचा डोंगर कोसळला आहे. निक्की तांबोळीच्या भावाचं करोनामुळे निधन झालं असून याची माहिती निक्कीनं सोशल मीडियावर एक पोस्ट शेअर करून दिली आहे. या पोस्टमध्ये तिनं आपल्या लाडक्या भावाच्या निधनाचं दुःख व्यक्त करत त्याच्यासाठी एक इमोशनल नोट लिहिली आहे.

निक्की तांबोळीच्या भावाला काही दिवसांपूर्वीच करोनाची लागण झाली होती. निक्कीच्या भावाला काही इन्फेक्शनमुळे मुंबईतील एका रुग्णालयात दाखल करण्यात आलं होतं. ज्यानंतर त्याला करोनाची लागण झाली आणि त्याची तब्येत खालावत गेली. काही दिवसांपूर्वीच निक्कीनं आपला भाऊ ठीक व्हावा यासाठी पूजा ठेवली होती. याशिवाय सोशल मीडियाच्या माध्यमातून सर्वांना तिच्या भावाच्या आरोग्यासाठी प्रार्थना करण्याचं आवाहन केलं होतं.

निक्कीनं ‘खतरों के खिलाडी’मध्ये सहभागी व्हावं असं तिच्या भावाचं स्वप्न होतं आणि त्यासाठीच तिनं या शोची ऑफरही काही दिवसांपूर्वीच स्वीकारल्याची माहिती दिली होती. ती फक्त तिचा भाऊ ठीक होऊन घरी कधी परततो याची वाट पाहत होती. आता भावाच्या निधनामुळे निक्कीला खूप मोठा धक्का बसला आहे. त्याच्या निधनानंतर निक्कीनं सोशल मीडियावर एक इमोशन पोस्ट शेअर करत निधनाची माहिती दिली आहे.

याशिवाय बिग बॉस १४ मध्ये निक्कीसोबत दिसलेला स्पर्धक आणि अभिनेता अली गोनीनं सुद्धा निक्कीच्या भावाच्या निधनानंतर ट्वीट करत दुःख व्यक्त केलं आहे. ‘निक्कीच्या भावाच्या निधनाची बातमी ऐकली. देव त्याच्या आत्म्यास शांती देवो. निक्की तू खंबीर राहा’ असं त्यानं आपल्या ट्वीटमध्ये लिहिलं आहे.