मुंबई: मिस इंडिया अर्थचा २०१४ चा किताब जिंकणारी मॉडेल आणि अभिनेत्री अलंकृता सहाय तिच्या बिनधास्त स्वभावासाठी ओळखली जाते. अलंकृतानं तिच्या करिअरमधील नुकताच एक मोठा खुलासा केला आहे. अलंकृतानाला तिच्या करिअरमध्ये एका वाईट प्रसंगाचा सामना करावा लागला आहे. एका निर्मात्यानं अलंकृतावर अश्लिल कमेंट करत गैरवर्तन केलं आहे. अलंकृता एका पंजाबी चित्रपटात काम करत होती. ज्याचं नाव ‘Fuffad Ji’ असं होतं. पण निर्मात्या गैरवर्तनाला वैतागलेल्या अलंकृतानं हा चित्रपट अर्ध्यावरच सोडून दिला आहे.

अलंकृतानं नुकत्याच दिलेल्या एका मुलाखतीत निर्मात्यानं तिच्यासोबत केलेल्या गैरवर्तन आणि अश्लिल कमेंट याबद्दल सांगितलं. ती म्हणाली, ‘चित्रपटाची संपूर्ण टीम चांगली होती. पण निर्माता अजिबात ठिक नव्हता. त्याचं वागणं खूपच गैरजबाबदार आणि अनैतिक होतं. मी पहिल्यांदा पंजाबला गेले नव्हते. मी आतापर्यंत अनेक निर्मात्यांसोबत काम केलं आहे आणि सर्वांसोबत मी चांगला अनुभव घेतला आहे. पण अशाप्रकारचा अनुभव मला याआधी कोणत्याच निर्मात्यासोबत आला नव्हता.’

अलंकृतानं या मुलाखतीत, त्या निर्मात्याचं वागणं एवढं बेजबाबदार झालं होतं की, त्याच्यासोबत काम न करण्याच्या निर्णयाप्रत आपण पोहोचल्याचं सांगितलं. अलंकृता म्हणाली, ‘सर्वांना आपल्या मर्यादा समजायला हव्यात आणि त्या त्यांनी पार करायला नको. जर तुम्ही माझ्याबद्दल अश्लिल कमेंट करत असाल तर मी का सहन करू. एक स्त्री म्हणून माझा स्वाभिमान माझ्यासाठी सर्वकाही आहे आणि काहीही झालं तर मला याची सुरक्षा करणं गरजेचं आहे.’

अलंकृता पुढे म्हणाली, ‘पैसा आणि ताकदीचा वापर करून कोणीच माझ्यावर कोणत्याही गोष्टीसाठी जबरदस्ती नाही करू शकत किंवा स्वतःच्या मर्यादांचं उल्लंघन नाही करू शकत.’ दरम्यान अलंकृता या चित्रपटातून पंजाबी चित्रपटसृष्टीत पदार्पण करत होती. पण निर्मात्याच्या गैरवर्तनामुळे तिला हा चित्रपट सोडावा लागला. पण या आधी तिनं काही पंजाबी गाण्यासाठी काम केलं आहे. याशिवाय तिनं विकी कौशलसोबत ‘लव पर स्क्वेअर फीट’ या चित्रपटात काम केलं होतं. २०१८ मध्ये हा चित्रपट नेटफ्लिक्सवर रिलीज झाला होता.