तू भूमिकांमधून सतत काही वेगळं करण्याच्या प्रयत्नांत दिसतेस…
– माझ्या आतापर्यंतच्या प्रवासात मी नेहमीच हे धोरण ठेवत काम केलं आहे. राणी कश्यप ही वेगळी भूमिका मिळाली. या भूमिकांना कुठल्या एका विशेषणात बसवणं अवघड आहे. मला नेहमीच साचेबद्ध भूमिकांपलीकडचं विश्व खुणावतं.

नायिकेलाच थोड्या खलनायकी वळणाच्या भूमिकेत बसवणं ही रिस्क वाटत नाही का?
– प्रेक्षकही अशा भूमिकांना प्रतिसाद देतात. नायिकेकडून असणाऱ्या अपेक्षा वा त्यांच्या भावनांना कुठेही तडा न जाऊ देत ती भूमिका साकारणं हेच आव्हान असतं. नायिका म्हणून मला अशा भूमिका निश्चितच आवडतात. रिस्क घेतल्याशिवाय काम करण्याची मजाही नाही.

तू खेळावर आधारित दोन चित्रपट एकाचवेळी करत आहेस…
– अर्थात, माझ्या खेळांबाबतच्या आवडीमुळेच दोन्ही चित्रपट मी करत आहे. त्या खेळाडूंसारखा फिटनेस आणि त्यांचे कष्ट खूप आहेत. तशा पद्धतीची शरीरयष्टी मिळवण्यासाठी खूप मेहनत घ्यावी लागली. एवढी मेहनत क्वचितच इतर कोणत्या चित्रपटांसाठी करावी लागली.

स्त्रीप्रधान चित्रपटांना चांगले दिवस असल्याची चर्चा सतत असते…
– बॉलिवूडमध्ये एकदा एका प्रकारची कलाकृती झाली, की लोकं त्याला एक साचेबद्ध नावं देतात. अमुक एक स्त्रीप्रधान वा पुरुषप्रधान असं काही मला वाटत नाही. अर्थात अशा चित्रपटांची संख्या वाढत आहे, हे उत्तम आहे. चित्रपटांना जसे नायक असतात तशी नायिकाही असतेच. त्यांना दाद मिळत आहे, हे महत्त्वाचं.

तू परदेशातही मस्त साडीत फिरताना दिसतेस. एक नवा ट्रेंड सेट करत आहेस का?
– लोकांच्या मनात साडीबद्दल एक वेगळी प्रतीमा आहे. साडी नेसून ती कॅरी करणं कठीण आहे, खूप पसारा आहे असं म्हणलं जातं. मलाही आधी थोडी अडचण व्हायची; पण
दाक्षिणात्य चित्रपटांमुळे मला त्याची सवय झाली. माझ्याकडे साड्यांचं स्वतःचं कलेक्शन आहे. मला स्वतःला मॉडर्न पद्धतीची जोड देत साडी नेसायला आवडतं. आपला पेहराव बाहेरही मिरवण्यात वावगं वाटत नाही.