पाहुणा कोण..मी ?की तुम्ही? बिबट्याचा फोटो शेअर करत सिद्धार्थ- मितालीची खास पोस्ट

मुंबई: मुंबईतील गोरेगाव येथील नगर वसाहतीत बिबट्या शिरल्याचं पाहायला मिळालं आहे. अभिनेता सिद्धार्थ चांदेकर आणि त्याची पत्नी मिताली मयेकर-चांदेकर यांनी नुकताच त्याच्या इमारतीच्या मागे आलेल्या एका बिबट्याचा फोटो शेअर केला आहे.

काही महिन्यांपूर्वी देखील मितालीनं त्यांच्या घरामागील जागेत बिबट्याचा वावर असलेला व्हिडिओ शेअर केला होता. सिद्धार्थ आणि मितालीनं नुकतेच बिबट्याचे फोटो शेअर केले आहेत. विशेष म्हणजे दोघांनी शेअर केलेल्या फोटोपेक्षा त्यांनी लिहिलेलं कॅप्शन सोशल मीडियावर चर्चेत आहे.

काय लिहिलं आहे सिद्धार्थची पोस्ट?
आमच्या बिल्डिंगच्या मागे आज एक पाहुणा आला होता. बराच वेळ आमच्याकडे टक लावून बघत बसला आणि झुडपात निघून गेला. त्याच्या चेहऱ्यावर एक जखम दिसली. ‘तुमच्यामुळे झालंय हे’ असं नजरेतून सांगत होता. बिल्डिंग मधले सगळे फोटो काढायला खिडकीत आले. मी पण आलो. तो फक्त स्थिर नजरेनं बघत होता आमच्याकडे. त्याचा नजरेतून कळत होतं स्पष्ट की पाहुणा तो नाही, आम्ही आहोत. हे त्याचं घर आहे.

तसंच मितालीनं देखील ‘पाहुणा कोण? मी? की तुम्ही?’, असं लिहित बिबट्याच्या डोळ्यातील प्रश्न स्वत:ला विचारला आहे.