तुर्भे येथील इंदिरा नगरमध्ये राहणाऱ्या अमोल राजू हिरवे (२३) या तरुणावर त्याच भागातील चौघा तरुणांनी पूर्ववैमन्यसातून हल्ला केल्याची घटना शनिवारी रात्री घडली. जबर जखमी झालेल्या अमोलला मुंबईतील जे. जे. रुग्णालयात दाखल केले आहे. तुर्भे एमआयडीसी पोलिसांनी चौघा हल्लेखोर तरुणांवर गुन्हा दाखल करून त्यापैकी दोघांना अटक केली आहे.

अमोल हा फ्लिपकार्ट सुपर मार्ट कंपनीत डिलिव्हरी बॉय म्हणून काम करतो. सप्टेंबर महिन्यात अमोलचे तो रहात असलेल्या भागातील राहुल दांडगे याच्यासोबत भांडण झाले होते. याच गोष्टीचा राग मनात धरून राहुल दांडगे, शेरू खान व त्याच्या अन्य दोन साथीदारांनी शनिवारी रात्री १०.३० वाजता अमोल मोटारसायकलवरून घरी परतत असताना, त्याला रस्त्यात अडविले. त्यानंतर चौघांनी त्याच्यावर धारधार शस्त्राने हल्ला केला. या हल्ल्यात अमोल जखमी होऊन त्याच ठिकाणी बेशुद्धावस्थेत पडल्यानंतर चौघा हल्लेखोरांनी पलायन केले. त्यानंतर जखमी अमोलला मुंबईतील जे. जे. रुग्णालयात दाखल करण्यात आले. या घटनेनंतर तुर्भे एमआयडीसी पोलिसांनी चौघा हल्लेखोरांवर गुन्हा दाखल करुन राहुल दांडगे (३२) व शेरु खान (२७) या दोघांना अटक केली आहे.