मुंबई : छोट्या पडद्यावरील ‘पवित्र रिश्ता’ ही मालिका खूपच लोकप्रिय झाली होती. या मालिकेच्या पहिल्या पर्वामध्ये मुख्य भूमिकेमध्ये अंकिता लोखंडे आणि सुशांतसिंह राजपूत होते. त्यांनी अर्चना आणि मानव ही पात्रे साकारली होती. या मालिकेला भरभरून प्रतिसाद मिळाला होता. त्यामुळे या मालिकेचे दुसरे पर्व काढण्याचा निर्णय निर्मात्यांनी घेतला. त्यानुसार या मालिकेचे चित्रीकरणही सुरू झाले आहे. चित्रीकरणाआधी अंकिताने सेटवरचे काही फोटो शेअर केले होते. आता तिने या मालिकेचे मोशन पोस्टर शेअर केले आहे.

अंकिताने तिच्या इन्स्टाग्राम अकाउंटवरून या मालिकेचे मोशन पोस्टर शेअर केले आहे. हे पोस्ट शेअर करताना तिने लिहिले की, ‘काही कथा या आपल्याला प्रेमावर विश्वास ठेवायला शिकवतात. अशीच एक एक प्रेम कथा पाहा…’ या मोशन पोस्टरमध्ये अर्चना आणि मानव दिसत नाही तरी त्यांचे अस्तित्व जाणवते. या व्हिडिओमध्ये हिरव्या पानांना हृदयाचा आकार दिला आहे, त्यानंतर या कार्यक्रमाचे नाव ‘पवित्र रिश्ता’ दिसते.

पवित्र रिश्ता २ ही मालिका झी ५ वरून प्रसारित केली जाणार आहे. या मालिकेच्या दुसऱ्या पर्वामध्ये मानवची भूमिका शाहिर साकारत आहे. पहिल्या पर्वामध्ये ही भूमिका दिवंगत कलाकार सुशांत सिंह राजपूतने साकारली होती. तर पहिल्या पर्वाप्रमाणे या पर्वातही अर्चनाची भूमिका अंकिता लोखंडे साकारणार आहे.

दरम्यान, अंकिता लोखंडेने ‘पवित्र रिश्ता २’ मालिकेचे मोशन पोस्टर शेअर केल्यानंतर ते सोशल मीडियावर प्रचंड व्हायरल झाले आहे. त्या पोस्टरवर युझर्सने विविध प्रतिक्रिया द्यायला सुरुवात केली आहे.

एका युझरने लिहिले आहे, ‘तुम्ही पवित्र रिश्ता २ का आणत आहात, सुशांतशिवाय पवित्र रिश्ता पाहयची इच्छा होत नाही.’ तर अन्य एका युझरने लिहिले आहे की, ‘मी नाही बघणार.. मी फक्त आधीचे पवित्र रिश्ता बघते.. सुशांतशिवाय सगळे असून ही ते सगळे पूर्ण नाही, मला त्याची आठवण येते.’ आणखी एका युझरने लिहिले आहे की, ‘सुशांत भाई गेले तेव्हापासून आम्ही कुणीही मालिका बघत नाही.’ अंकिताने शेअर केलेल्या या पोस्टवर अनेकांनी त्यांना सुशांतची आठवत येत असल्याची प्रतिक्रिया लिहिली आहे.