प्रधानमंत्री दिव्याशा केंद्रामुळे दिव्यांग बांधवांना विनाविलंब सहायक उपकरणे मिळण्यास मदत होईल – पालकमंत्री शिवेंद्रसिंहराजे भोसले – महासंवाद

• ‘डीडीआरसी’मार्फत चालविले जाणारे पहिलेच प्रधानमंत्री दिव्याशा केंद्र
• हरंगुळ बु. येथील संवेदना प्रकल्पाला पालकमंत्र्यांकडून ५ लाखांची देणगी

लातूर, दि. ३० : दिव्यांग बांधवांना कृत्रिम अवयव, सहायक उपकरणे यांचे वितरण करण्यासाठी यापूर्वी भारतीय कृत्रिम अंग निर्माण निगम अर्थात अॅलिमको या संस्थेमार्फत दिव्यांग बांधवांची आरोग्य तपासणी शिबिरे आयोजित केली जात होती. मात्र, आता लातूर येथे प्रधानमंत्री दिव्याशा केंद्र सुरु झाल्यामुळे जिल्ह्यातील दिव्यांग बांधवांची आरोग्य तपासणी करून त्यांना आवश्यक सहायक उपकरणे देण्याची कार्यवाही नियमितपणे सुरु राहील. जिल्ह्यातील दिव्यांग बांधवांसाठी ही अतिशय दिलासादायक बाब असल्याचे पालकमंत्री शिवेंद्रसिंहराजे भोसले यांनी सांगितले.

जिल्हा दिव्यांग पुनर्वसन केंद्र, संवेदना प्रकल्प, भारतीय कृत्रिम अंग निर्माण निगम आणि जिल्हा परिषद समाज कल्याण विभाग यांच्या संयुक्त विद्यमाने व मुंबई येथील आयईसी लिमिटेड यांच्या सहकार्याने लातूर येथील जिल्हा दिव्यांग पुनर्वसन केंद्र अंतर्गत प्रधानमंत्री दिव्याशा केंद्राचे उद्घाटन पालकमंत्री ना. भोसले यांच्या हस्ते झाले.

आमदार संभाजी पाटील निलंगेकर, आमदार अभिमन्यू पवार, जिल्हाधिकारी वर्षा ठाकूर-घुगे, जिल्हा परिषदेचे मुख्य कार्यकारी अधिकारी अनमोल सागर, संजय अग्रवाल, सामाजिक न्याय विभागाच्या केंद्रीय सल्लागार मंडळाचे सदस्य सुरेश पाटील, आरईसी लिमिटेडचे महाव्यवस्थापक सुमन एक्का, अॅलिमकोचे कमलेश यादव, संवेदना प्रकल्पाचे अध्यक्ष डॉ. योगेश निटूरकर, जिल्हा समाज कल्याण अधिकारी संतोषकुमार नाईक आदी यांची यावेळी उपस्थिती होती.

प्रधानमंत्री दिव्याशा केंद्रामुळे दिव्यांग बांधवांना लवकरात लवकर साहित्य मिळाल्यामुळे त्यांचे जीवनमान सुखकर होईल. समाजातील प्रत्येक घटकापर्यंत शासकीय योजनांचा लाभ पोहचवून त्यांचा विकास करण्यासाठी केंद्र व राज्य शासनाच्या माध्यमातून प्रयत्न होत आहेत. दिव्यांग बांधवांसाठीही विविध शासकीय योजनांची अंमलबजावणी केली जात आहे. जिल्ह्यातील दिव्यांग बांधवांना या योजनांचा जास्तीत जास्त लाभ देवून त्यांच्या विकासासाठी प्रयत्न करण्यात येतील, असे पालकमंत्री ना. भोसले यावेळी म्हणाले. तसेच जिल्हा दिव्यांग पुनर्वसन केंद्राला कायमस्वरूपी जागा उपलब्ध करून देण्यासाठी प्रयत्न करणार असल्याचे त्यांनी सांगितले.

दिव्यांग बांधवांना प्रशिक्षण देवून त्यांना आर्थिकदृष्ट्या स्वावलंबी बनविण्यासाठी संवेदना प्रकल्पाच्या माध्यमातून केले जाणारे प्रयत्न कौतुकास्पद आहेत. दिव्यांगांसाठी राज्यातील पहिली औद्योगिक प्रशिक्षण संस्था संवेदना प्रकल्पाच्या माध्यमातून चालविली जात आहे. त्यामुळे अनेक दिव्यांग बांधवांना स्वयंरोजगार, रोजगाराची संधी उपलब्ध होणार आहे. यासोबतच दिव्यांग कल्याणाचे इतरही उपक्रम या संस्थेमार्फत चालविले जात असून या संस्थेचे कार्य अभिमानास्पद असल्याचे पालकमंत्री ना. भोसले यावेळी म्हणाले. तसेच या संस्थेच्या कामासाठी आपण वैयक्तिकरित्या पाच लाख रुपयांची देणगी देत असल्याचे त्यांनी जाहीर केले.

आमदार संभाजी पाटील निलंगेकर यांनी दिव्यांग बांधवांसाठी संवेदना प्रकल्पामार्फत करण्यात येत असलेल्या कार्याचा उल्लेख करून जिल्ह्यात यापूर्वी सहायक उपकरणे वाटपासाठी या संस्थेने केलेल्या प्रयत्नांमुळे एकाच वेळी सुमारे १२ हजार ५०० दिव्यांग बांधवांना कृत्रिम अवयव आणि सहायक उपकरणे वितरीत करण्यात आली होती, असे त्यांनी सांगितले.

प्रधानमंत्री नरेंद्र मोदी यांनी दिव्यांग बांधवांच्या कल्याणसाठी अनेक योजना हाती घेतल्या असून त्यामुळे दिव्यांग बांधवांना मदत होत असल्याचे आमदार अभिमन्यू पवार म्हणाले. तसेच दिव्यांग बांधवांना मोठ्या प्रमाणात सहायक उपकरणे वाटप करण्यात आल्याचे त्यांनी सांगितले.

जिल्हा दिव्यांग पुनर्वसन केंद्राला कायमस्वरूपी जागा उपलब्ध करून देणे आवश्यक असून दिव्यांग बांधवांसाठी राबविण्यात येणाऱ्या योजनांची अंमलबजावणी गतीने व्हावी, असे सामाजिक न्याय विभागाच्या केंद्रीय सल्लागार मंडळाचे सदस्य सुरेश पाटील यावेळी म्हणाले.

प्रारंभी संवेदना प्रकल्पाचे अध्यक्ष डॉ. निटूरकर यांनी प्रास्ताविकात संस्थेच्या कामाची माहिती दिली. व्यंकट लामजणे यांनी निवेदन केले.

 पालकमंत्र्यांच्या हस्ते ३५० दिव्यांग बांधवांना सहायक उपकरणांचे वितरण

गतवर्षी डिसेंबर महिन्यामध्ये झालेल्या आरोग्य तपासणी शिबिरात सहभागी झालेल्या सुमारे ३५० दिव्यांग बांधवांना पालकमंत्री शिवेंद्रसिंहराजे भोसले यांच्या हस्ते सहायक उपकरणांचे वितरण करण्यात आले. यामध्ये मोटाराईज ट्रायसिकल, ट्रायसिकल, व्हीलचेअर, रोलेटर, सीपीचेअर, श्रवणयंत्र, काठी आदी साधनांचा समावेश होता. वितरण कार्यक्रमासाठी बसवराज पैके, प्रविण सगर, सुनिल वसमत्कर, चापेकर, राहुल देशपांडे यांनी परिश्रम घेतले.