मुंबई: बॉलिवूड अभिनेत्री नीना गुप्ता त्यांच्या खासगी आयुष्यामुळे नेहमीच चर्चेत असतात. सिंगल मदर असतानाही बॉलिवूडमध्ये स्वतःचं वेगळं स्थान निर्माण करण्यापर्यंतचा त्यांचा प्रवास थक्क करणारा आहे. आता नुकतंच त्यांचं आत्मचरित्र ‘सच कहूं तो‘ प्रकाशित झालं. ज्याची सोशल मीडियावर जोरदार चर्चा सुरू आहे. त्यांनी या पुस्तकात त्यांच्या खासगी आयुष्यातील बरेच असे उलगडे केले आहेत ज्याबद्दल आजपर्यंत कोणालाच काही माहीत नव्हतं. या पुस्तकात त्यांनी मसाबाच्या वेळीच्या आपल्या प्रेग्नन्सीचाही उल्लेख केला आहे. जेव्ही लग्न न करता त्या क्रिकेटर विवियन रिचर्ड्स यांच्या मुलीची आई होणार होत्या त्यावेळी त्यांच्या एका मित्रानं त्यांनी ‘गे’ व्यक्तीशी लग्न करण्याचा सल्ला दिला होता.

प्रेग्नन्ट नीना गुप्ता यांना सतीश कौशिकनी केलं होतं लग्नासाठी प्रपोज, वाचा संपूर्ण किस्सा
नीना गुप्ता यांनी आपल्या पुस्तकात त्यांच्या खासगी आयुष्याबाबत अनेक खुलासे केले आहेत. ज्यात वेस्ट इंडीजचे माजी क्रिकेटर विवियन रिचर्ड्स यांच्यासोबतच्या रिलेशनशिपचाही उल्लेख आहे. नीना विवियन यांच्या प्रेमात होत्या आणि त्यांच्यापासून त्या प्रेग्नन्ट होत्या. विवियन त्यांची पत्नी आणि कुटुंबाला सोडण्यासाठी तयार नव्हते. त्यामुळे नीना यांनी कठीण परिस्थितीचा सामना करावा लागला होता.

नीना यांनी आपल्या पुस्तकात लिहिलं, ‘जेव्हा मी मसाबाच्या वेळी प्रेग्नन्ट होते तेव्हा माझा खास मित्र सुजॉय मित्रानं माझ्यासाठी लग्नाचा एक प्रस्ताव आणला होता. तो मुलगा बँकर होता, वांद्रे येथे त्याचं घर होतं. नंतर समजलं की तो ‘गे’ होता आणि कुटुंबीयाच्या दबावाखाली येऊन लग्न करत होता. माझ्या बाळाला स्वतःचं नाव देण्यास तो तयार होता पण तो माझी किंवा माझ्या बाळाची कोणतीही जबाबदारी घेणार नसल्याचं त्यानं स्पष्ट शब्दात सांगितलं होतं.’

व्यथा! नीना गुप्तांचं ज्याच्याशी होणार होतं लग्न त्याने अखेरच्या मिनिटाला सोडली साथ
एका हिंदी वेबसाइटला दिलेल्या मुलाखतीत नीना म्हणाल्या, ‘फक्त वादांपासून वाचण्यासाठी लग्न करणं मला योग्य वाटत नव्हतं. अभिनेत्री असल्यानं मला मोठ्या कठीण परिस्थितीतून जावं लागणार आणि अनेकांच्या प्रश्नांची उत्तरं द्यावी लागणार हे माहीत होतं. पण मी निश्चय केला होता. जोपर्यंत शक्य आहे तोपर्यंत मी हे सैल कपड्यांच्या मागे लपवून ठेवेन.’

नीना गुप्ता यांनी आपल्या पुस्तकात अभिनेता सतीश कौशिक यांनी घातलेल्या लग्नाच्या मागणीचाही उल्लेख केला आहे. मसाबाच्या वेळी प्रेग्नन्ट असताना सतीश यांनी नीना यांना लग्नाची मागणी घातली होती. नीना प्रेग्नन्ट असतानाही सतीश यांनी त्यांच्याशी लग्न करण्याची इच्छा व्यक्त केली होती. नीना सांगतात, ‘त्यावेळी सतीश मला म्हणत असे. जर हे बाळ डार्क स्कीन घेऊन जन्माला आलं तर तू हे सतीश कौशिकचं बाळ आहे असं सर्वांना सांगू शकतेस.’ पण अर्थातच नीना यांनी सतीश यांचं हा प्रस्ताव नाकारला.