प्रेग्नन्सीमध्ये घातलेले कपडे विकून अनुष्का वाचवणार २.५ लाख लीटर पाणी, पण कसं? इथे वाचा

मुंबई: बॉलिवूड अभिनेत्री अनुष्का शर्मा सध्या पती विराट कोहली आणि मुलगी वामिकासोबत इंग्लंडमध्ये आहे. अनुष्का सोशल मीडियावर बरीच सक्रिय असते आणि आपल्या आगामी प्रोजेक्टची माहिती ती चाहत्यांसोबत शेअर करत असते. चित्रपटांव्यतिरिक्त अनुष्का अनेकदा सामाजिक कार्यांमध्येही सहभागी होताना दिसते. यासोबतच पर्यावरणासंबंधीत उपक्रमांमध्येही ती भाग घेताना दिसते. आताही अनुष्कानं अशाच प्रकारच्या एका उपक्रमात वेगळ्या पद्धतीनं सहभागी होण्याचा निर्णय घेतला आहे.

अनुष्का शर्मानं तिच्या प्रेग्नन्सीच्या काळात वापरलेले स्टायलिश आणि फॅशनेबल कपडे ऑनलाइन विकण्याचा निर्णय घेतला आहे. यातून मिळणारे पैसे ती स्नेहा मातृत्व सुरक्षा या एनजीओला देणार आहे. यासोबतच यातून पर्यावरण संरक्षणही होणार आहे. अनुष्कानं हाती घेतलेल्या या उपक्रमातून २.५ लाख लीटर पाण्याची बचत होणार आहे. हा विचार आपण प्रेग्नन्सीच्या वेळीच केला होता असं अनुष्का सांगते.

ई-टाइम्सशी बोलताना अनुष्का म्हणाली, ‘हा एक सोपा मार्ग आहे ज्यामुळे तुम्ही एक चांगलं आयुष्य जगू शकता. आपले कपडे सर्कुलेशन फॅशन सिस्टिममध्ये वापरून तुम्ही पर्यावरणासाठी एक चांगलं काम करू शकता. माझ्या प्रेग्नन्सीच्या काळात मी विचार केला की आपल्या आयुष्यातील हा वेळ सर्वात खास असतो. मग याचा उपयोग सर्कुलर इकॉनमीसाठी केला तर चांगलं होईल. यामुळेच मला आशा आहे की, आपण एकत्र येऊन याची सुरुवात करू शकतो.’

अनुष्काच्या कामाबद्दल बोलायचं तर ती शेवटची २०१८ मध्ये रिलीज झालेल्या शाहरुख खानच्या ‘झीरो’ चित्रपटात दिसली होती. त्यानंतर मात्र ती कोणत्याही चित्रपटात दिसली नाही. सध्या अनुष्का आपली मुलगी वामिकाला वेळ देत आहे. याशिवाय ती निर्मिती क्षेत्रातही उतरली आहे.