फक्त एका भांडणातून अभिनेत्याच्या वडिलांनी पत्नी आणि मुलीची केलेली हत्या, कलाकारावरही झाडलेली गोळी

मुंबई- आजही ९० च्या दशकातले अनेक स्टार आहेत जे मोठ्या पडद्यावर सक्रीय आहेत. त्यांचे सिनेमे आवडीने पाहिले जातात. असं असलं तरी असेही काही स्टार कलाकार होते ज्यांनी नायक म्हणून काम केलं. पण काही सिनेमांनंतर ते पूर्णपणे गायब झाले. यातलं एक नाव म्हणजे अभिनेता कमल सदाना. ‘बेखुदी’ सिनेमातून त्याने हिंदी सिनेसृष्टीत पदार्पण केलं होतं. १९९२ मध्ये हा सिनेमा प्रदर्शित झाला होता. या चित्रपटात काजोल त्याची नायिका होती. हा सिनेमा फ्लॉप झाला, पण दोन्ही अभिनेत्यांना त्यातून वेगळे आयुष्य मिळाले.

‘रंग’ सिनेमातील ‘तुझे ना देखूं तो चैन’ हे गाणं आजही अनेकांच्या तोंडी आहे. १९९३ मध्ये प्रदर्शित झालेल्या या सिनेमात जेवढी दिव्या भारतीबद्दल लोकांना उत्सुकता होती तेवढीच उत्सुकता सिनेमातील नायकाबद्दलही होती. अभिनेता कमल सदानाची ओळख काही ठराविक सिनेमांसाठीच राहिली. त्याच्या खासगी आयुष्यात एक मोठं वादळ आलं ज्यातून तो अनेक वर्ष सावरुच शकला नाही. २१ ऑक्टोबर १९७० रोजी जन्मलेल्या कमलचं खासगी आयुष्य त्याच्या वाच्या २० व्या पूर्णपणे उद्ध्वस्त झाले.

कमल सदानाचा पहिला सिनेमा बेखुदी मोठ्या पडद्यावर फारसा चाललानाही. पण त्यानंतर आलेल्या ‘रंग’ सिनेमाने त्याला ओळख मिळवून दिली. यानंतर त्याने अनेक सिनेमांत काम केलं. पण रंग सिनेमासारखी प्रसिद्धी त्याला कधीच मिळाली नाही.

यानंतर मोठ्या पडद्यावरून कमलने आपलं लक्ष छोट्या पडद्याकडे अर्थात टीव्हीकडे वळवलं. कसम से मालिकेत त्याने काम केलं. एवढंच नाही तर दिग्दर्शनातही त्याने आपलं नशिब आजमावून पाहिलं. २००७ मध्ये त्याने कर्कश सिनेमाचं दिग्दर्शन केलं. याशिवाय २०१४ मध्ये त्याने रोर नावाच्या सिनेमाचं दिग्दर्शन केलं. पण हा सिनेमाही फ्लॉप ठरला.

२० व्या वाढदिवसाच्या दिवशी कमलचे वडील प्रसिद्ध दिग्दर्शक ब्रिज सदाना यांनी पत्नी आणि मुलीवर गोळ्या झाडल्या. यावेळी कमल तिथेच होते. कमल यांनी तिथून पळ काढला म्हणून त्यांचा जीव वाचला. यानंतर त्याच रात्री वडिलांनीही आत्महत्या केली. कमलची आई सैदा खान आणि वडिलांमध्ये सतत भांडणं व्हायची. कमल यांच्या वाढदिवसालाही काहीसं असंच घडलं.

ही संपूर्ण घटना कमलच्या डोळ्यासमोर घडली. या घटनेचा त्याच्या मनावर खोलवर परिणाम झाला. यानंतर कमल यांचं समुपदेशन करण्यात आलं होतं. आश्चर्याची गोष्ट म्हणजे कमल सदाना याला वडिलांनी आई आणि बहिणीवर गोळी का झाडली याचं मुळ कारण आजपर्यंत माहीत नाही.