बदलापूर पूर्व भागातील शिरगाव भागात असलेल्या एमआयडीसीतील ग्लोबल इंटरमिडीएट प्रा. लि. या कंपनीत पशुखाद्य बनवण्यासाठी लागणाऱ्या कच्च्या मालाची निर्मिती केली जाते. या कंपनीतून गुरुवारी रात्री ११ वाजण्याच्या सुमारास अचानक वायुगळती सुरू झाली होती. त्यामुळे शिरगाव, आपटेवाडी, दत्तवाडी, कात्रप, गावदेवी या दाट लोकवस्तीच्या भागात एकच खळबळ उडाली. वायुगळतीमुळे या भागातील हजारो रहिवाशांना डोळ्यात जळजळ, श्वास घेण्यास त्रास, उलट्या, खोकला यांसारखा त्रास जाणवू लागला होता. या वायुगळतीची तीव्रता एवढी होती की, रस्त्यावरून जाणाऱ्या वाहनचालकांनाही मोठा त्रास झाला. या घटनेची माहिती मिळताच बदलापूर अग्निशमन दलाच्या जवानांनी तातडीने धाव घेत एक तासाच्या आत वायुगळतीवर नियंत्रण मिळवले. मात्र रात्री उशिरापर्यंत परिसरात दुर्गंधी पसरली होती.
वायूचा दाब वाढल्याने दुर्घटना
या कंपनीतून सल्फ्युरिक, नायट्रिक आणि इतर दोन प्रकारच्या वायूंचे मिश्रण असलेल्या वायूची गळती झाली. या प्रकल्पातील वायूचा दाब नियंत्रित न झाल्याने हा वायू बाहेर पडला असावा, असा अंदाज ‘एमपीसीबी’चे अधिकारी शंकर वाघमारे यांनी व्यक्त केला. हा वायू नागरिकांच्या आरोग्यास हानिकारक असल्याबाबतही अधिकाऱ्यांनी दुजोरा दिला.
लवकरच बैठक
अंबरनाथ, बदलापूर एमआयडीसीतील अनेक कंपन्यांमध्ये वायुगळती तसेच अपघातांच्या घटना समोर येत असतात. रासायनिक कंपन्यांची नियमित तपासणी आणि पाहणी होणे अपेक्षित आहे. मात्र, संबंधित पदे रिक्त असल्याने कंपनीतील तपासण्या होत नसल्याची माहिती सूत्रांनी दिली. या पार्श्वभूमीवर, लवकरच एमआयडीसी, एमबीसीबी आणि इतर संबंधित प्रशासकीय विभागांसोबत संयुक्त बैठक घेण्याचा विचार असल्याचेही प्रादेशिक अधिकारी शंकर वाघमारे यांनी सांगितले.