तालुक्यातील लोणखेडी येथील एका सात वर्षीय शाळकरी बालिकेवर दिनेश रमेश पवार (पाटील) या नराधमाने लैंगिक अत्याचार केल्याची घटना सोमवारी (दि. २९) सायंकाळच्या सुमारास घडली. ती शाळेतून आपल्या शेतातील घराकडे परत जात असताना दुचाकीने सोडून देण्याच्या बहाण्याने तिच्या घरापुढील नाल्याकाठी घेऊन जात हे दुष्कर्म नराधमाने केले. रक्तबंबाळ अवस्थेत चिमुरडी घरी परतल्यावर हा प्रकार निदर्शनास आल्याने बालिकेच्या आई-वडीलांनी ग्रामस्थांसह तालुका पोलिस ठाण्यात धाव घेतली. पोलिसांनी दिनेश पवार यास मध्यरात्रीच अटक केली असून, बालिकेची प्रकृती चिंताजनक असल्याने तिच्यावर जिल्हा सर्वोपचार रुग्णालयात उपचार सुरू आहेत.
लोणखेडीत सोमवारी सायंकाळी शाळेतून आपल्या घरी जाताना दिनेश पवार याने बालिकेवर लैंगिक अत्याचर केल्याची घटनेने परिसरात संताप व्यक्त होत आहे. या घटनेनंतर नराधमाला अटक झाली. परंतु, त्याला कठोर शिक्षा करा अन्यथा, आमच्या ताब्यात द्या या मागणीसाठी संप्तत लोणखेडी ग्रामस्थांनी मंगळवारी (दि. ३०) सकाळी तालुका पोलिस ठाण्यात धडक मोर्चा नेत आपला रोष व्यक्त केला. ग्रामस्थांनी रोष व्यक्त करताना सांगितले की, या गुन्ह्याचा तपास कशा पद्धतीने सुरू आहे यावर नियंत्रणासाठी शासकीय, अशासकीय समिती गठीत करून याबाबत माहिती बालिकेच्या कुटुंबीयांना देण्यात यावी. तसेच राजकीय नेते, पदाधिकाऱ्यांनी या प्रकरणात दखल देऊ नये अन्यथा त्यांना जागा दाखविण्याचा इशारा आदिवासी समाजाने दिला आहे. या प्रकरणातील आरोपीला कठोर शिक्षा झाले पाहिजे, अशीही ग्रामस्थांनी मागणी केली. सोमवारी शाळा सुटल्यानंतर मुले व मुली आपल्या शेतशिवारांमधील घराकडे परतत होते. त्यात पीडीत व तिच्यापेक्षा मोठया बहिणीचाही समावेश होता. त्यावेळी दुचाकीवरून आलेल्या नराधमाने बालिका व तिची बहीण दोघांना घरी सोडून देतो असे आमिष दिले. त्यावेळी लहान बहिणीला गाडीवर बसवत दुसरीला खालीच राहू देत दुचाकी पळवून नेली. यानंतर नराधमाने बालिकेच्या घरापुढील नाल्याकाठी नेत तिच्यावर लैंगिक अत्याचार केला. बालिका घरी पोहोचल्यानंतर हा प्रकार निदर्शनास आला. मुलींनी सांगितलेल्या वर्णनानुसार तसेच शेतातून दुचाकीवर कोण ये-जा करीत होते याची खात्री पटल्यानंतर नराधमाला पोलिसांनी मध्यरात्री अटक केली.