मुंबई: बॉलिवूड अभिनेता सुनील शेट्टीची मुलगी अथिया शेट्टी तिच्या चित्रपटांपेक्षा क्रिकेटर केएल राहुल सोबत अफेअरच्या चर्चांमुळे सर्वाधिक चर्चेत असते. अर्थात हे दोघं एकमेकांना डेट करत असल्याच्या चर्चा जरी सुरू असल्या तरीही दोघांनी अजूनपर्यंत मात्र या नात्यावर कोणताही प्रतिक्रिया दिलेली नाही. पण त्याचे फोटो सोशल मीडियावर नेहमीच चर्चेचा विषय ठरतात. याआधी अनेकदा दोघांनी एकमेकांसोबतचे फोटो सोशल मीडियावर पोस्ट केले आहेत. पण आता अथियाचा एक फोटो सोशल मीडियावर व्हायरल होताना दिसत आहे आणि यावरूनच ती सध्या राहुलसोबत इंग्लंडमध्ये असल्याचा अंदाज व्यक्त केला जात आहे.

अथिया शेट्टीनं तिच्या इन्स्टाग्रामवर नुकताच एक ब्लॅक अँड व्हाइट फोटो शेअर केला आहे. ज्यानंतर अथिया आणि राहुल इंग्लंडमध्ये एकत्र असल्याचं बोललं जात आहे. अथियानं सोशल मीडियावर फोटो पोस्ट केल्यानंतर चाहत्यांनी तिच्यावर प्रश्नांचा भडिमार केला. ‘तू सध्या राहुलसोबत इंग्लंडमध्ये आहे का?’ अशा आशयाचे प्रश्न सर्व चाहते तिला विचारताना दिसत आहेत. फोटो शेअर करताना अथियानं त्याला ‘तुमची एनर्जी वाचवून ठेवा’ असं कॅप्शन दिलं आहे.

अभिनेत्रीने फोटो शेअर केल्यानंतर ती इंग्लंडमध्ये असल्याच्या चर्चा होऊ लागण्याचं महत्त्वाचं कारण म्हणजे त्याआधी केएल राहुलनं त्याच्या इन्स्टाग्रामवर शेअर केलेले त्याचा फोटो होता. राहुलनं शेअर केलेल्या फोटोंमध्ये त्याच्या मागच्या बाजूला काही बॅरिकेट दिसत आहे आणि विशेष म्हणजे अगदी तसेच बॅरिकेट अथियाच्या फोटोमध्येही दिसत आहेत. त्यामुळे सध्या अथिया आणि राहुल इंग्लंडमध्ये एकत्र असल्याच्या चर्चा रंगल्या आहेत.

अथिया शेट्टी आणि केएल राहुल खरंच इंग्लंडमध्ये एकत्र आहेत की नाहीत याची पुष्टी अद्याप झालेली नाही. पण अथियाच्या या फोटोवर सुनील शेट्टी, नव्या नवेली नंदा, आकांक्षा रंजन कपूर यांसारख्या अनेक सेलिब्रेटींनी कमेंट केल्या आहेत. सध्या भारतीय क्रिकेट टीम न्यूझिलंडसोबत वर्ल्ड टेस्ट चॅम्पियनशिप खेळण्यासाठी इंग्लंडमध्ये आहे.