बॉलिवूड अभिनेत्रींना मराठी सिनेसृष्टीची भुरळ; इलाक्षी गुप्ता दिसणार ‘या’ चित्रपटात

मुंबई– बॉक्स ऑफिसवर धुमाकूळ घालणाऱ्या ‘तान्हाजी- द अनसंग वॉरिअर‘ चित्रपटातून ओळख निर्माण करणारी बॉलिवूड अभिनेत्री इलाक्षी गुप्ता पुन्हा एकदा प्रेक्षकांच्या भेटीला येत आहे. ‘तान्हाजी’ चित्रपटात इलाक्षीने सोयराबाईंची भूमिका साकारली होती. चित्रपटातील इलाक्षीच्या भूमिकेचं प्रेक्षकांकडून बरंच कौतुक झालं होतं. याच चित्रपटातून तिने बॉलिवूडमध्ये पदार्पण केलं होतं. मराठमोळ्या अंदाजातील इलाक्षी प्रेक्षकांच्या मनाला भावली होती. आता इलाक्षी पुन्हा एकदा प्रेक्षकांची वाहवा मिळवायला सज्ज झाली आहे. इलाक्षी लवकरच मराठी चित्रपटसृष्टीत पदार्पण करणार असून ती ‘भ्रम‘ या चित्रपटातून प्रेक्षकांच्या भेटीला येणार आहे.

‘भ्रम’ या चित्रपटाचं दिग्दर्शन वैभव लोंढे करत असून हा एक भयपट असणार आहे. प्रेक्षकांना भीतीदायक अनुभव देणाऱ्या या चित्रपटात इलाक्षी मुख्य भूमिका साकारत आहे. चित्रपटाच्या सेटवरील अनेक फोटो इलाक्षीने सोशल मीडियावर शेअर केले आहेत. इलाक्षीचे फोटो पाहून चाहत्यांची चित्रपटाबद्दलची उत्सुकता आणखी वाढली आहे. या चित्रपटात इलाक्षीसोबत अभिनेता अभि आमकर मुख्य भूमिकेत झळकणार आहे. इलाक्षीचे सोशल मीडियावर लाखो फॉलोवर्स आहेत. त्यामुळे पारंपरिक वेशात इलाक्षीला पाहणारे चाहते आता तिच्या पुढील भूमिकेसाठी आतुर आहेत.

इलाक्षी एक डॉक्टर असून तिला अभिनयाची आवड आहे. इलाक्षी तिचे निरनिराळे फोटो चाहत्यांसोबत शेअर करत असते. तिला व्यायामाची प्रचंड आवड आहे. इलाक्षी व्यायामाचे अनेक व्हिडीओ चाहत्यांसोबत शेअर करत असते. आता ‘भ्रम’ चित्रपटातील अभिनयाने इलाक्षी पुन्हा प्रेक्षकांची मनं जिंकून घेणार का, हे पाहणं औसुक्याचं ठरेल. इलाक्षी लवकरच अभिनेता श्रेयस तळपदे सोबत ‘लव्ह यू शंकर’ चित्रपटातही झळकणार आहे.