भूतकाळाच्या पानांमध्ये दडलेले सत्य आदित्य स्वीकारणार का? की नवं वळण…

मुंबई : ‘माझा होशील ना’ ही झी मराठीवरून प्रसारित केल्या जाणा-या मालिकेत एक धक्कादायक घटना घडली आहे. या मालिकेचा नायक आदित्य कश्यपला जेडीच्या ऑफिसमध्ये ‘आदित्य ग्रुफ ऑफ कंपनी’च्या संदर्भातील काही महत्त्वाची कागदपत्रे सापडतात. ही कागदपत्रे त्याच्या भूतकाळाशीही निगडत असल्याने जेडीचा त्याला संशय येतो. त्यामुळे त्या कागदपत्रांची माहिती तो पोलिसांना देतो. परंतु ही खबर जेडीला मिळते आणि तो आदित्यवर प्राणघातक हल्ला घडवून आणतो. सई तिथे वेळेवर पोहोचल्याने ती रक्तबंबाळ अवस्थेतील आदित्यला हॉस्पिटलमध्ये नेते. आदित्यची मृत्यूशी झुंज सुरू होते.

मालिकेच्या आगामी भागांमध्ये आदित्यशी मृत्यूशी दोन हात करून परत येतो. दरम्यान, आदित्यची खरी ओळख जेडीला आता झालेली आहे. त्यामुळे आता तो आदित्यला मारण्यासाठी पुन्हा प्रयत्न करणार हे नक्की. या सगळ्या गोष्टींबद्दल चारही मामांना कळते. आदित्यची खरी ओळख कुणाला तरी झालेली आहे म्हणूनच त्या व्यक्तीने त्याच्यावर जीवघेणा हल्ला केल्याची खात्री त्यांना पटते. त्यामुळे ते आदित्यला आणि सईला पुन्हा ‘वसंत स्मृती’मध्ये येण्यासाठी आग्रह करतात. परंतु आदित्य मात्र त्याला सपशेल नकार देतो. त्यामुळे सर्व मामा आदित्यला त्याच्या भूतकाळाबद्दल आणि त्याच्या ख-या ओळखीबद्दल सांगण्याचा निर्णय घेतात. तसेच आदित्य ग्रुप ऑफ कंपनीची सर्व सूत्रे त्याच्या हाती सोपवण्याचे देखील ठरवतात. भूतकाळाच्या पोटात दडलेले सत्य जेव्हा आदित्य समोर येईल का? जेव्हा हे सत्य आदित्यला उलगडेल तेव्हा त्याची प्रतिक्रिया काय असेल? आदित्य ग्रुप ऑफ कंपनीचे आपण खरे मालक आहोत हे सत्य आदित्यला आणि इतर सर्वांच्या पचनी पडेल का ? की जेडी पुन्हा एकदा आदित्यवर हल्ला करेल, त्यातून आदित्य वाचेल का की जेडीचा गेम त्याच्यावरच उलटेल? हे पाहणे आता उत्सुकतेचे ठरणार आहे.

‘माझा होशील ना’ या मालिकेत अभिनेता विराजस कुलकर्णी आदित्यची तर अभिनेत्री गौतमी देशपांडे ही सईची भूमिका साकारत आहेत. ‘माझा होशील ना’ मालिकेतील कथानकात येणारी रंजक वळणे आणि कलाकारांचे अभिनय यांमुळे ही मालिका घराघरात लोकप्रिय झाली आहे.