मुंबई: करोना व्हायरसमुळे मनोरंजन क्षेत्राला मोठा फटका बसला आहे. अनेक चित्रपट शूटिंग पूर्ण होऊनही ते रिलीज होऊ शकलेले नाहीत. पण असं असलं तरीही लॉकडाऊनच्या काळातही ओटीटी प्लॅटफॉर्मवर मात्र मनोरंजनाचा धमाका होणार आहे. अभिनेत्री नीना कुलकर्णी यांचा ‘फोटो प्रेम‘ हा चित्रपट लवकरच प्रेक्षकांच्या भेटीला येत असून या चित्रपटाचा ट्रेलर नुकताच रिलीज झाला आहे.

‘फोटो प्रेम’ या चित्रपटाचा ट्रेलर रिलीज झाला आहे. या ट्रेलरमध्ये चित्रपटाची कथा नीना कुलकर्णी यांच्या व्यक्तीरेखेभोवती फिरताना दिसते. ट्रेलरच्या सुरुवातीला एका मेलेल्या व्यक्तीचा चांगल्या फोटोची शोधाशोध सुरू असते. पण तो मिळत नाही. त्यानंतर नीना कुलकर्णी आपला एक तरी चांगला फोटो असावा असा विचार करू लागतात. थोडा वेगळ्या धाटणीचा हा ट्रेलर अर्थातच सर्वांना विचार करायला भाग पाडतो.

हा चित्रपट ओटीटी प्लॅटफॉर्मवर येत्या ७ मे ला रिलीज होणार आहे. चित्रपटाचं दिग्दर्शन आदित्य राठी यांनी केलं असून नीना कुलकर्णी यांच्या व्यतिरिक्त या चित्रपटात अमिता खोपकर, विकास हांडे, चैत्राली रोडे, समीर धर्माधिकारी, समय संजीव तांबे, अश्विनी मुकादम, विठ्ठल गांवकर आणि निलकंठ सावंत यांच्याही महत्त्वपूर्ण भूमिका आहेत.

बच्चे-कंपनीसाठी खास चित्रपट महोत्सव; ‘हे’ चित्रपट येणार भेटीला