मुंबई : करोनाच्या (Coronavirus) दुसऱ्या लाटेने महाराष्ट्रात धडक देऊन अनेक दिवस लोटले असले तरीही अद्याप आरोग्य यंत्रणेवरील ताण कमी झालेला नाही. अजूनही अनेक ठिकाणी इंजेक्शन आणि ऑक्सिजनचा तुटवडा भासत आहे. या पार्श्वभूमीवर राज्याचे अन्न आणि औषध मंत्री डॉ. राजेंद्र शिंगणे यांनी महत्त्वपूर्ण माहिती दिली आहे.

‘राज्यातील सर्व जिल्ह्यांमध्ये ऑक्सिजनचा पुरवठा समप्रमाणात होण्याच्या दृष्टीने त्याचप्रमाणे रेमडेसिवीरच्या उपलब्धतेबाबत अन्न व औषध प्रशासन विभागाच्या माध्यमातून योग्य नियोजन करण्यात येत आहे,’ असं डॉ. राजेंद्र शिंगणे यांनी म्हटलं आहे.

ऑक्सिजन पुरवठ्याबाबत काय म्हणाले राजेंद्र शिंगणे?

राज्यात कोविड रूग्ण संख्या झपाट्याने वाढलेली आहे. या रूग्णांवर उपचारासाठी मेडिकल ऑक्सिजन हे अत्यंत महत्त्वाचे आहे. त्यामुळे राज्यात उत्पादित होणारे आणि इतर राज्यातून प्राप्त होणारे ऑक्सिजन राज्यातील सर्व जिल्ह्यांना सुरळीतपणे व त्या-त्या जिल्ह्याच्या आवश्यकतेनुसार प्राप्त होणे अत्यंत गरजेचे आहे. यासाठी अन्न व औषध प्रशासनाद्वारे राज्यातील लिक्वीड मेडिकल ऑक्सिजन उत्पादकांना त्यांनी दररोज कोणत्या जिल्ह्यात किती ऑक्सिजन पुरवावा यासाठी पुरवठाबाबतचे विवरणपत्र तयार करून ते उत्पादकांना देण्यात येते. दिनांक ६ मे २०२१ साठी प्रशासनाने उत्पादकांना १७१३ टन ऑक्सिजन पुरवण्यासाठी पुरवठा विवरणपत्र जारी केले आहे . याबाबत राजेंद्र शिंगणे यांनी माहिती दिली आहे.

राज्यात काय आहेरेमडेसिवीरची स्थिती?

रेमडेसिवीर इंजेक्शनचे उत्पादन मे. सिप्ला, हेटेरो, झायडस, मायलन, सन फार्मा, डॉ.रेड्डीज व जुबिलंट या औषध उत्पादक कंपन्यामार्फत करण्यात येते. राज्यात मे. सिप्ला लि. या उत्पादकाचे उत्पादन होते. वरील उत्पादकांच्या प्रामुख्याने भिवंडी, पुणे व नागपूर येथील डेपोमधून या औषधाचा पुरवठा राज्यभर करण्यात येतो.

राज्य शासनाद्वारे राज्यासाठी रेमडेसिविर इंजेक्शनचा वाढीव कोटा मिळावा यासाठी नियमितपणे पाठपुरावा करण्यात येत होता. केंद्र शासनाच्या आरोग्य व कुटुंब कल्याण मंत्रालयाने त्यांचे पत्र दिनांक- १ मे अन्वये महाराष्ट्र राज्यासाठी वरील सात उत्पादक मिळून एकूण ८,०९,५०० रेमडेसिवीरचा साठा दिनांक- २१ एप्रिल ते ९ मे या कालावधीत मंजूर केलेला आहे.

दि. २१ एप्रिल ते ४ मे अखेर पर्यंत ४७४७९१ इतका साठा खाजगी व शासकीय रूग्णालयांना वितरीत करण्यात आला आहे. दिनांक- ४ मे रोजी राज्यात ४२०२४ इतका साठा वितरीत झाला आहे. दिनांक ५ मे रोजीच्या वितरणासाठी अंदाजे ५०, ३८० इतका साठा उत्पादकाकडून प्राप्त झाला आहे. त्यातील काही साठा आज व उर्वरित साठा दि. ६ मेरोजी प्रत्यक्ष वितरित होणार आहे, असं मंत्री राजेंद्र शिंगणे यांच्याकडून सांगण्यात आलं आहे.