अंधेरी : प्रसिद्ध दिग्दर्शक राजकुमार हिराणी यांच्या कंपनीच्या आणि मुलाचे नावाने सोशल मीडियावर प्रोफाइल तयार करून लोकांची फसवणूक केली जात असल्याचे समोर आले आहे. जाहिरात, चित्रपटांमध्ये भूमिका देतो सांगून इच्छुकांकडून माहिती मागविण्यात येत होती. हा प्रकार लक्षात येताच हिराणी यांच्या कंपनीमार्फत अंधेरी पोलिस ठाण्यात तक्रार करण्यात आली आहे.

राजकुमार हिराणी यांची आर. एच. फिल्मस् या कंपनीमध्ये भागीदारी असून या कंपनीच्या माध्यमातून त्यांनी अनेक चित्रपटांचे दिग्दर्शन केले आहे. कंपनीच्या ईमेल आयडीवर एका अनोळखी व्यक्तीचा ईमेल आला. राजकुमार हिराणी यांचा मुलगा कबीर हिराणी यांच्या नावाने इन्स्टाग्रामवर एक प्रोफाइल तयार करण्यात आले असून त्याआधारे हिराणी यांच्या आगामी तीन चित्रपटांची जाहिरात केली जात आहे. तीन चित्रपट तसेच काही जाहिरातींचे लवकरच चित्रिकरण सुरू करण्यात येणार असून, यासाठी १८ ते २५ या वयोगटातील तरुण-तरुणींना भूमिका करण्याची संधी आहे. इच्छुक असलेल्या आणि मॉडेल क्षेत्रात कार्यरत असलेल्यांनी दिलेल्या ईमेल आयडीवर माहिती पाठवा, असे या जाहिरातीमध्ये नमूद करण्यात आले होते. ईमेल पाठविणाऱ्याने कबीर इराणीच्या नावाने असलेल्या इन्स्टाग्राम अकाऊंटचे स्क्रीनशॉट जोडले होते.

कुणाची फसवणूक होऊ नये, यासाठी हिराणी यांच्या कंपनीने अंधेरी पोलिस ठाण्यात तक्रार केली. इन्स्टाग्रामवरील हे खाते हिराणी यांचा मुलगा कबीर याचे नसून, अशी कोणत्याच प्रकारची जाहिरात सोशल मीडियाद्वारे केली नसल्याचे कंपनीने म्हटले आहे. त्यांच्या या तक्रारीवर अंधेरी पोलिसांनी वेगवेगळ्या कलमांतर्गत गुन्हा दाखल केला आहे.